İlin ən məşhur sitatları. “Maska taxın” çağırışı birinci yeri tutur
ABŞ-ın Yel Hüquq Məktəbi kitabxanasının direktor müavini Fred Şapiro 2020-ci ilin ən məşhur sitatlarını müəyyənləşdirib.
Fred Şapironun topladığı sitatlar hər il “Yel sitatlar kitabı” adı altında yenilənərək çap olunur.
Kitab ilk dəfə 2006-cı ildə işıq üzü görüb.
2020-ci ilin ən məşhur sitatları siyahısında ABŞ-ın baş infeksionisti Entoni Fauçinin koronavirusun yayılmasının qarşısını almaq məqsədilə səsləndirdiyi “Maska taxın” çağırışı birinci, Minneapolisdə ağdərili polisin yerə yıxaraq boğub öldürdüyü qaradərili Corc Floydun son nəfəsində təkrarladığı “Nəfəs ala bilmirəm” sözləri ikinci yeri tutur.
Siyahıda ABŞ prezidenti Donald Trampdan, yeni seçilmiş prezident Cozef Baydendən də sitatlar var.
Şapiro deyir ki, o, bəlağətli yox, məşhur, xüsusilə də zamanın ruhunu əks etdirən sitatları toplayır.
“Yel sitatlar kitabı”na əsasən, 2020-ci ilin ən məşhur sitatları bunlardır:
1. “Maska taxın” – doktor Entoni Fauçinin CNN-ə müsahibəsi zamanı səsləndirdiyi çağırış.
2. “Nəfəs ala bilmirəm” – Minneapolisdə polisin yerə yıxıb boğduğu Corc Floydun son nəfəsində təkrarladığı sözlər.
3. “Bir gün sehrli şəkildə yoxa çıxacaq” – prezident Donald Trampın Ağ evdə “Afro-Amerikan tarixi ayı” çərçivəsində keçirdiyi görüşdə koronavirus pandemiyası haqqında dedikləri.
4. “Dezinfeksiya vasitələrinin koronavirusu bir dəqiqədə yox etdiyini görürəm. Bəs bunun iynə vurdurmaq, ya da təmizlik etmək kimi başqa bir yolu varmı?” – Donald Trampın Ağ evdə koronavirus üzrə işçi qrupunun keçirdiyi brifinqdə söylədikləri.
5. “Sizə heç vaxt yalan danışmayacam. Söz verirəm” – Kayli Mak Enaninin Ağ evin mətbuat katibi kimi keçirdiyi ilk brifinqdəki vədi.
6. “Mənim ən çılğın arzum odur ki, yeni prezident təyin olunana qədər vəzifəmdə qalım” – ABŞ Ali Məhkəməsinin hakimi Rut Beyder Ginzburqun nəvəsi Klara Speraya söylədikləri.
7. “Əgər mənimlə Tramp arasında tərəf tutmaqda çətinlik çəkirsinizsə, deməli, siz qara deyilsiniz” – Cozef Baydenin “The Breakfast Club” (“Səhər yeməyi klubu”) radio verilişində dedikləri.
8. “Elm buna mane olmamalıdır” – Ağ evin mətbuat katibi Mak Enaninin məktəblərin yenidən açılması məsələsinə münasibəti.
9. “Sən yalançı itsifət atlı əsgərsən” – ABŞ-ın yeni seçilmiş prezidenti Cozef Baydenin seçki kampaniyası zamanı Hamptonda bir tələbəyə söylədikləri.
10. “Bu gün biz hamımız “Leykers” olmalıyıq” – “Los Anceles Klippers” basketbol komandasının məşqçisi Dok Riversin “Los Anceles Leykers” komandasının məşhur basketbolçusu Kobi Brayantın ölümündən sonra jurnalistlərə dedikləri.
Mənbə: Apnews.com
