Peyvənd təklifləri
ABŞ-da çalışan iqtisadçı alim, siyasətçi Qubad İbadoğlu yaşadığı Nyu-Cersi ştatında koronavirus infeksiyasına qarşı peyvənd vurulmasına başladığını yazır: “Eyni adama peyvənd iki mərhələdə vurulacaq. Birinci peyvənddən iki həftə sonra ikinci peyvəndləmə olacaq.
Peyvəndləmə risk qrupları üzrə aparılacaq. İlk mərhələdə həkimlər, yanğınsöndürənlər, yaşı 80-dən, 70-dən, 65-dən yuxarı olanlar, astma xəstəliyinin daşıyıcıları peyvənd ediləcək”.
2019-cu ilin dekabrında Çində üzə çıxaraq 220 ölkə, ərazi və məkana yayılan koronavirus infeksiyası 1 milyon 710 mindən çox adamın həyatına son qoyub. 203593 nəfər yoluxub, onların 2253-ü dünyasını dəyişib.
Novator.az-ın məlumatına görə, Qubad İbadoğlu Azərbaycanda ən geci gələn il yanvarın 1-dən koronavirusa qarşı peyvənd vurulmasına başlamağı təklif edir: “Peyvəndləmə hər bir Azərbaycan vətəndaşı üçün ödənişsiz olmalıdır. Həmçinin risk qrupları üzrə ardıcıllıq tətbiq edilə bilər. Məsələn, 2020-ci ilin əvvəlinə Azərbaycanda yaşı 65-70 arasında olan əhalinin sayı 299,3 min nəfər, yaşı 70-dən yuxarı olanların sayı 420,6 min nəfər göstərilib. Ölkədə aktiv vərəm xəstələrinin sayı 3,6 min nəfər, tənəffüs orqanları xəstəliklərinin daşıyıcıları 273,7 min nəfərdir. Böyük ehtimalla onların əksəriyyəti ahıl yaşında olanlardır.
Peyvəndin haradan alınması da ictimai diqqətdən kənarda qalmamalıdır. Bildiyim qədər hakimiyyət dairələrində Rusiya və ya Çin istehsalı olan peyvəndin alınması müzakirə edilir. Bu iki ölkədən peyvənd alınmasının əleyhinəyəm.
Əhaliyə peyvənd danışıqları barədə müntəzəm məlumat verilməlidir. Peyvəndin mənşə ölkəsi, effektivlik dərəcəsi, sayı, qiyməti kimi informasiyalara çıxış əlçatan olmalıdır. Eyni zamanda peyvəndləmənin əhatə dairəsi və mərhələlərinə dair məlumat da açıqlanmalıdır”.
