Yeni rejim qüvvəyə minib
Dekabrın 14-də Nazirlər Kabinetinin sərt karantin rejimi üzrə qərarı qüvvəyə minib. Koronavirus infeksiyasını cilovlamaq üçün tətbiq olunan rejim 2021-ci il yanvarın 18-dək ölkə üzrə bir çox sahədə iş və xidmətləri dayandırıb.
Bakı, Sumqayıt, Gəncə, Mingəçevir, Şirvan şəhərlərinin və Abşeron rayonunun ərazisinə, eləcə də Lənkəran, Masallı, Cəlilabad, Şəki, Zaqatala, Quba, Xaçmaz, Yevlax, Bərdə, Biləsuvar və İsmayıllı rayon mərkəzlərinə (kənd və qəsəbələr istisna olmaqla) giriş-çıxış yasaqlanıb. Həmin ərazilərdə hərəkət məhdudiyyəti tətbiq edilib. Evdən çıxmaq üçün SMS icazə sistemindən istifadə etmək və ya Daxili İşlər Nazirliyinin 102 xidmətinə zəng vurmaq gərəkdir.
2019-cu ilin dekabrında Çində üzə çıxaraq dünyanı bürüyən koronavirus infeksiyasına Azərbaycanda ilk yoluxma bu il fevralın 28-də qeydə alınıb. Nazirlər Kabineti yanında operativ qərargahın son rəsmi hesabatında yoluxanların ümumi sayı 171423 nəfər, xəstəlikdən ölənlərin sayı 1883 nəfər göstərilib.
Martın 31-dən xüsusi karantin rejimi hökm sürür. Sərhədlər qapadılıb, dəfn mərasimləri istisna olmaqla yas mərasimləri, kütləvi tədbirlər, ad günləri, toy, nişan və bu kimi mərasimlər yasaqlanıb, başqa qadağalar qoyulub.
