UEFA Çempionlar Liqasında qrup mərhələsinin beşinci turu start götürüb. Novator.az-ın məlumatına görə, dekabrın 1-də keçirilmiş oyunlarda C qrupundan “Portu” (Portuqaliya) və D qrupundan “Liverpul” (İngiltərə) 1/8 finala adlayıblar.

A qrupundan “Bavariya” (Almaniya), C qrupundan “Mançester Siti” (İngiltərə), E qrupundan “Çelsi” (İngiltərə) və “Sevilya” (İspaniya), G qrupundan “Barselona” (İspaniya) və “Yuventus” (İtaliya) 1/8 final vəsiqəsini ötən həftə təmin ediblər.

Reqlamentə əsasən, qrupda ilk iki yeri tutan komandalar növbəti raunda bilet alır, üçüncü yerin sahibi Avropa Liqasına köçür.

Qruplardakı 12 komandanın 1955-ci ildə yaradılmış, 1991-ci ilə qədər Çempionlar kuboku adlanmış turnirdə zəfəri var. “Real” 13, “Bavariya” və “Liverpul” 6, “Barselona” 5, “Ayaks” 4, “İnter” və “Mançester Yunayted” 3, “Yuventus” və “Portu” 2, “Marsel”, “Borussiya” (Dortmund) və “Çelsi” 1 titula sahibdir.

Mənbə: Uefa.com