İsrail mediası Netanyahunun məxfi səfərindən xəbər verir
İsrailin baş naziri Benyamin Netanyahu Səudiyyə Ərəbistanına məxfi səfər edib. Novator.az xəbər verir ki, bununla bağlı İsrailin “Haaretz” qəzetində yazı dərc olunub.
Yazıda deyilir ki, səfər ABŞ-ın dövlət katibi Mayk Pompeonun bugünlərdə Fars körfəzində olduğu vaxt baş verib. Netanyahunun təyyarəsi Neom şəhərinə enib və 2 saat orada qalıb. Baş nazirin Neomda Səudiyyə şahzadəsi Məhəmməd ibn Salmanla və Mayk Pompeo ilə görüşdüyü, İsrailin xarici kəşfiyyat idarəsi olan “Mossad”ın rəhbəri Yosi Koenin də görüşdə iştirak etdiyi bildirilir.
Məlumata görə, görüşdə Səudiyyə Ərəbistanı-İsrail münasibətlərinin normallaşdırılması və İranla bağlı məsələlər müzakirə olunub. Hər hansı razılaşma imzalanmayıb.
İsrail mənbələri bu ölkənin baş nazir müavini-müdafiə naziri Beni Qantsın və xarici işlər naziri Qabi Aşkenazinin görüşdən xəbərsiz olduğunu qeyd edir.
Görüşdən bir qədər əvvəl Səudiyyə Ərəbistanının xarici işlər naziri Faysal bin Ferhan Al Saud “Reuters” agentliyinə müsahibəsində demişdi ki, onlar İsraillə əlaqələrin normallaşmasını çoxdan dəstəkləyirlər, amma bunun baş verməsi üçün israillilərlə fələstinlilər arasında daimi sülhə nail olunmalıdır.
Mənbə: Haaretz.com
