Turizm: gələn 3,7 dəfə, gedən 4,2 dəfə azalıb
2020-ci ilin yanvar-oktyabr aylarında Azərbaycana 155 ölkədən 720,3 min və ya əvvəlki ilin on ayı ilə müqayisədə 3,7 dəfə az əcnəbi gəlib. Hesabatı Dövlət Sərhəd Xidmətinə istinadla Dövlət Statistika Komitəsi yayıb.
Azalma koronavirus pandemiyası üzündən tətbiq olunan məhdudiyyətlərlə əsaslandırılır.
Rəsmi məlumata görə, yanvar-oktyabr aylarında ölkəyə gələnlərin 28 faizi Rusiya, 24,3 faizi Gürcüstan, 18,9 faizi Türkiyə, 8,6 faizi İran vətəndaşları, qalanları digər ölkələrin təmsilçiləridir.
Hesabata əsasən, xarici ölkələrə gedən Azərbaycan vətəndaşlarının sayı 2019-cu ilin yanvar-oktyabr ayları ilə müqayisədə 4,2 dəfə azalaraq 1 milyon 106,7 min nəfər olub. Vətəndaşların 30,3 faizi İrana, 27,2 faizi Gürcüstana, 19,2 faizi Rusiyaya, 14,6 faizi Türkiyəyə, 8,7 faizi digər ölkələrə səfər edib.
