Siyəzən, Qəbələ və Kürdəmir atəşə tutulub
Oktyabrın 22-si səhər Azərbaycan ərazisi Ermənistandan ballistik raketlərlə atəşə tutulub. Müdafiə Nazirliyinin məlumatına görə, düşmən saat 7 radələrində Siyəzən rayonu istiqamətində 3 raket, saat 9 radələrində Qəbələ rayonu istiqamətində 2 raket və Kürdəmir rayonu istiqamətində 1 raket buraxıb: “Ermənistan silahlı qüvvələrinin hədəfi dinc əhali və mülki infrastruktur olub. Tələfat yoxdur”.
Prezidentin köməkçisi, administrasiyanın xarici siyasət məsələləri şöbəsinin müdiri Hikmət Hacıyev “Tvitter”də yazıb ki, günahsız mülki əhali və mülki obyektlər hədəfə alınıb: “Ermənistan mülki şəxslərə qarşı müharibə cinayətlərini davam etdirir”.
1988-ci ildə Ermənistan Azərbaycanın Dağlıq Qarabağ bölgəsini ələ keçirmək üçün təcavüzə başlayıb. 1991-ci ildən təcavüz şiddətlənərək hərbi işğala çevrilib. 1994-cü ildə atəşkəslə dayanan müharibədə Dağlıq Qarabağ bölgəsi (Xankəndi şəhəri, Şuşa, Xocalı, Xocavənd rayonları, keçmiş Ağdərə rayonu) və onun ətrafındakı bölgələr (Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonları) Ermənistanın nəzarətinə keçib.
2020-ci il sentyabrın 27-dən Azərbaycan Ordusu işğal bölgəsində əməliyyat keçirir: Cəbrayıl, Füzuli, Zəngilan şəhərləri, həmin rayonların, eləcə də Xocavənd rayonunun və keçmiş Ağdərə rayonunun bir çox kəndi və qəsəbəsi azad olunub.
Ermənistan silahlı qüvvələri Tərtər, Goranboy, Bərdə, Yevlax, Ağcabədi, Beyləqan, Füzuli, Ağdam rayonlarını, Gəncə, Mingəçevir şəhərlərini və başqa əraziləri müntəzəm atəşə tutur.
Baş Prokurorluğun hesabatına görə, Ermənistan silahlı qüvvələrinin Azərbaycanın yaşayış məntəqələrini atəşə tutması nəticəsində sentyabrın 27-dən oktyabrın 21-dək 63 mülki şəxs həlak olub, 292 nəfər xəsarət alıb, 1981 yaşayış evi, 90 çoxmənzilli bina, 386 mülki obyekt dağılıb.
Azərbaycan Respublikasının xəritəsi
