Oktyabrın 22-si səhər Azərbaycan ərazisi Ermənistandan “Skad” ballistik raketləri ilə atəşə tutulub.

Düşmən saat 7 radələrində Siyəzən rayonu, saat 9 radələrində Qəbələ və Kürdəmir rayonları istiqamətində raketlər buraxıb.

Bütün hallarda hədəf dinc əhali və mülki infrastruktur olub.

Qəbələnin raket atəşinə tutulması nəticəsində 17 yaşlı Murad Əmirbəyov bədən xəsarətləri alıb, rayonun kəndlərindən birinin ərazisində 5 evə ciddi ziyan dəyib.

Düşmənin Oğuz-Qəbələ-Bakı su kəmərini hədəfə alaraq buraxdığı raketi isə Azərbaycan Ordusunun Hava Hücumundan Müdafiə Qüvvələri zərərsizləşdirib, raketin hissələri su kəmərinin yaxınlığına düşüb.

Kürdəmir rayonuna atılan, böyük dağıdıcı gücə malik raket yaşayış məntəqəsinə hədəflənib. Raket düşdüyü ərazidə böyük çuxur yaradıb. Xəsarət alan yoxdur.

Siyəzən rayonuna da “Skad” raketi atılıb. Raket Xəzər dənizinə düşüb.