Nəzarət səlahiyyətləri
Prezident İlham Əliyev İqtisadiyyat Nazirliyinin, Qida Təhlükəsizliyi Agentliyinin və Dövlət Turizm Agentliyinin əsasnamələrinə dəyişiklik edib. Novator.az-ın məlumatına görə, İqtisadiyyat Nazirliyi ictimai iaşə, turizm və mehmanxana fəaliyyəti istisna olmaqla sahibkarlıq subyektləri və onların vəzifəli şəxslərinin epidemiya əleyhinə rejimin, sanitariya-gigiyena və karantin rejimlərinin tələblərinə əməl etməsinə nəzarəti həyata keçirmək hüququ alıb.
Qida Təhlükəsizliyi Agentliyinə ictimai iaşə sahəsində fəaliyyət göstərən sahibkarlıq subyektləri və onların vəzifəli şəxsləri üzrə eyni hüquq verilib.
Dövlət Turizm Agentliyi isə turizm və mehmanxana fəaliyyəti ilə məşğul olan sahibkarlıq subyektləri və onların vəzifəli şəxslərinin epidemiya əleyhinə rejimin, sanitariya-gigiyena və karantin rejimlərinin tələblərinə əməl etməsinə nəzarəti həyata keçirəcək.
Səlahiyyətləri rəsmiləşdirən fərmanlar sentyabrın 24-də imzalanıb.
Azərbaycanda koronavirus pandemiyasını cilovlamaq üçün xüsusi karantin rejimi tətbiq olunur.
2019-cu ilin dekabrında Çində üzə çıxaraq dünyanı bürüyən koronavirus infeksiyasına Azərbaycanda ilk yoluxma bu il fevralın 28-də qeydə alınıb. Nazirlər Kabineti yanında operativ qərargahın 24 sentyabr hesabatında yoluxanların ümumi sayı 39686 nəfər göstərilib: onların 581-i vəfat edib.
