And içdi
Altıncı dəfə Belarus prezidenti kürsüsünə sahib çıxan Aleksandr Lukaşenko sentyabrın 23-də rəsmən and içib. Novator.az-ın məlumatına görə, paytaxt Minskdəki İstiqlaliyyət sarayında keçirilən andiçmə mərasiminə parlamentin deputatları, dövlət rəsmiləri, mərkəzi və yerli icra hakimiyyəti orqanlarının rəhbərləri, elm, mədəniyyət və idman xadimləri qatılıb.
Belarusda prezident seçkisi avqustun 9-da keçirilib. 5 nəfərin yarışdığı seçkidə prezident Aleksandr Lukaşenko 80,1 faiz səslə qalib elan edilib.
İctimaiyyət seçkinin rəsmi nəticələrini qəbul etmir, ölkədə davamlı etiraz aksiyaları keçirilir. Avropa İttifaqı ölkələri, ABŞ və başqa demokratik dövlətlər prezident seçkisinin nəticələrini tanımır.
1954-cü ildə doğulan Aleksandr Lukaşenko prezident kürsüsünü 1994-cü ildən tutur. İlk dəfə 5 il müddətinə seçilən Aleksandr Lukaşenko 1996-cı il referendumu ilə səlahiyyət müddətini 2001-ci ilədək uzadıb. 2001-ci ildə o, ikinci dəfə prezident kürsüsünə yiyələnib. 2004-cü il referendumunda bir nəfərin iki dəfədən çox prezident seçilməsinə məhdudiyyət götürülüb və Aleksandr Lukaşenko 2006, 2010 və 2015-ci illərin seçkilərinə də qatılaraq dövlət başçısı postunu əlində saxlayıb.
