“Azad olmaq Tofiq bəyin haqqıdır”
AXCP sədri, Demokratik Qüvvələrin Milli Şurasının Koordinasiya Mərkəzinin üzvü Əli Kərimli məhbus siyasətçi Tofiq Yaqublunu azadlığa buraxmağa çağırır. Novator.az-ın məlumatına görə, Əli Kərimli özünün “Facebook” səhifəsində yazır ki, Tofiq Yaqublunun Avropa İnsan Hüquqları Məhkəməsinin tövsiyəsi ilə mülki xəstəxanaya köçürülməsi, özünün etibar etdiyi həkim Adil Qeybullanın onun müalicəsinə cəlb edilməsi yaxşı haldır: “Ancaq bu qətiyyən o demək deyil ki, Tofiq bəyin həyatına təhlükə aradan qalxıb. Tofiq bəyin xəstəxanaya köçürülməsi hakimiyyətə və bizim hamımıza əlavə bir neçə gün vaxt qazandırır ki, böhran əsaslı şəkildə həll olunsun. Bu problemin həlli isə Tofiq bəyin azad edilməsindən keçir.
Heç kim unutmasın ki, 6 ay bundan əvvəl Tofiq bəy şərlənib həbs olunanda sağlam (yaşına uyğun) adam idi. Keçirdiyi aclıq aksiyası da, səhhətinin pisləşməsi də, koma vəziyyətinə düşməyin bir addımlığında olması da Tofiq bəyin sifarişlə, qanunsuz həbs edilməsinin nəticəsidir. Problemlərin səbəbini aradan qaldırmaq lazımdır.
Azad olmaq Tofiq bəyin haqqıdır. O azad edilməlidir. Azərbaycan cəmiyyəti, mütərəqqi dünya ictimaiyyəti hökumətdən bunu tələb edir.
Azərbaycan hakimiyyəti isə Tofiq bəyi nəinki azad etmir, hətta Nizami Rayon Məhkəməsi bir həftədir onun şikayətini Bakı Apellyasiya Məhkəməsinə göndərmir. Əlbəttə, bu münasibət Nizami Rayon Məhkəməsinin özfəaliyyətinin deyil, bütövlükdə rejimin Tofiq Yaqubluya hələ də davam edən qərəzli münasibətinin nəticəsidir.
Tofiq bəyin taleyinə ictimai diqqət qətiyyən azalmamalıdır. O hələ də girovdur, ölüm aclığını davam etdirir. Onun həyatına təhlükə hələ də realdır. Hökumət də, elə toplum olaraq biz hamımız da tələsməliyik. Tofiq bəy dərhal azad edilməlidir!”
2020-ci il martın 22-də tutulan Tofiq Yaqublu silah qismində istifadə olunan əşyalardan istifadə etməklə xuliqanlıqda günahlandırılır. İttihama əsasən, o, həmin gün öz avtomobili ilə Bakının Nizami rayonunda qaydaları pozub, Elxan Cəbrayılovun idarə etdiyi avtomobillə toqquşmadan sonra mübahisə zəminində ona və yoldaşı Cəvahir Cəbrayılovaya xəsarət yetirib.
Siyasətçi ittihamı qəbul etmir, bildirir ki, Elxan Cəbrayılov qəsdən qəza törədib, sonra dava salıb. Onun sözlərinə görə, hadisənin təxribat olduğunu anladığı üçün maşınının qapısını kilidləyib, şüşəni qaldırıb və polis gəlməyənə kimi yerə düşməyib, heç kimi vurmayıb.
İbtidai istintaqı Nizami Rayon Polis İdarəsi aparıb.
Sentyabrın 3-də Nizami Rayon Məhkəməsində Tofiq Yaqubluya 4 il 3 ay müddətinə azadlıqdan məhrumetmə cəzası kəsilib. Hökmdən apellyasiya şikayəti verilib. Bakı Apellyasiya Məhkəməsinə ünvanlanan şikayətdə Tofiq Yaqubluya bəraət istənir, azadlığa buraxılması tələb edilir.
Tofiq Yaqublu sentyabrın 2-də Bakının Şüvəlan qəsəbəsindəki 3 saylı İstintaq Təcridxanasında bəraət və azadlıq tələbi ilə aclıq aksiyasına başlayıb.
Bakıdakı “City Hospital”da çalışan həkim, tibb elmləri doktoru Adil Qeybulla sentyabrın 11-də Tofiq Yaqubluya baş çəkib, sanitar hissədə məhbusu müayinə edib.
Tofiq Yaqublu sentyabrın 12-si axşam “City Hospital”a köçürülüb. Ədliyyə Nazirliyinin Penitensiar Xidməti Tofiq Yaqublunun mülki xəstəxanaya köçürülməsinə Adil Qeybullanın xahişi əsasında razılıq verildiyini açıqlayıb.
Məlumatlarda həmçinin Tofiq Yaqublunun vəkillərinin Avropa İnsan Hüquqları Məhkəməsinə müraciətinin nəzərə alındığı vurğulanıb. Həmin müraciətdə aclıq aksiyasında səhhəti ağırlaşan, koma vəziyyətinə düşməsi ehtimalı böyük olan Tofiq Yaqublunun mülki xəstəxanaya köçürülməsi barədə məsələ qaldırılıb.
1961-ci il təvəllüdlü Tofiq Yaqublu milli azadlıq hərəkatının (1988-1991) fəalı, Qarabağ müharibəsi veteranıdır. Əbülfəz Elçibəyin prezidentliyi dövründə (1992-1993) Binəqədi Rayon İcra Hakimiyyəti başçısının birinci müavini vəzifəsində çalışıb. 1992-ci ildən Müsavat Partiyasının üzvüdür. 2010-2018-ci illərdə partiya başqanının müavini postunu tutub.
Demokratik Qüvvələrin Milli Şurasının rəhbərliyində təmsil olunur.
2013-cü il fevralın 4-dən 2016-cı il martın 17-dək həbsdə yatıb.
Tofiq Yaqublu yenə həbsə gedir
Tofiq Yaqublunun məhkəməsi qapalı keçiriləcək
Ev dustaqlığına da yox deyildi
Tofiq Yaqublu nədən narazıdır?
Məhkəmənin Tofiq qərarı dəyişməz qaldı
Həbsin uzadılması: şikayət təmin olunmadı
Tofiq Yaqublu məhkəməni səbirsizliklə gözləyir
Tofiqin mühakiməsi “yox”larla başladı
Tofiq Yaqublu: “Mən əsir götürülmüş şəxsəm”
“Yalan danışıb qapını bağlayırsan, sonra da deyirsən…”
Tofiqin əsgər oğlunun problemi var
Üç vəsatətdən biri təmin olundu
Hökm ərəfəsində: Tofiq aclığa başladı
Tofiq Yaqublu: “Sona qədər gedəcəm”
Professor Tofiqin təhlükədə olduğunu yazır
Tofiq Yaqublunun halı pisləşib, ancaq aksiyanı dayandırmır
Sabir Rüstəmxanlı Tofiq Yaqublu ilə bağlı açıqlama yayıb
