Sentyabrın 14-ü səhər saat 6-dan Bakı Metropoliteni fəaliyyətini bərpa edir. Nazirlər Kabineti yanında operativ qərargahın 11 sentyabr məlumatında deyilir ki, sentyabrın 30-dək şənbə-bazar günləri paytaxtda ictimai nəqliyyat fəaliyyət göstərmədiyinə görə metro da işləməyəcək. Sentyabrın 19-na keçən gecədən sentyabrın 21-i səhər saat 6-dək və sentyabrın 26-na keçən gecədən sentyabrın 28-i səhər saat 6-dək metro bağlı olacaq.

Şərtlərə görə, metr stansiyalarının ərazisində və qatarlarda mütləq qaydada tibbi maskalardan istifadə edilməlidir. Tibbi maska ağız və burun boşluğunu tam örtməlidir.

Stansiyalarda fəaliyyət göstərən apteklərə tibbi maska satışı üçün şərait yaradılıb.

Bildirilir ki, stansiyalara daxil olan sərnişinlərin hərarəti, seçmə qaydada olmaqla, müvafiq tibbi avadanlıq vasitəsi ilə yoxlanacaq.

2019-cu ilin dekabr ayında Çində üzə çıxaraq 215 ölkə, ərazi və məkana yayılan koronavirus xəstəliyi indiyədək 914 mindən çox adamın həyatına son qoyub.

Azərbaycanda ilk yoluxma bu il fevralın 28-də qeydə alınıb, martda 5, apreldə 19, mayda 39, iyunda 150, iyulda 235, avqustda 86, sentyabrda 22 nəfər koronavirusun qurbanı olub.

Koronavirusla mübarizə çərçivəsində martın 31-dən Azərbaycanda xüsusi karantin rejimi hökm sürür. Bu rejim mərhələli şəkildə, ayrı-ayrı sahələr üzrə yumşaldılır.

Bakı metrosu iyunun 20-dən bağlıdır.