Prezident İlham Əliyev sentyabrın 4-də ADA Universitetinin iki yeni korpusunun açılışında iştirak edib. AZƏRTAC-ın məlumatına görə, yeni korpuslarda 535 nəfərlik akt zalı, sinif və qrup otaqları, kitabxana, laboratoriyalar var, sinif otaqları tərcümə sistemi, smart lövhə və digər zəruri tədris avadanlığı ilə təchiz olunub.

Yeni istifadəyə verilən korpusların birində ADA Universitetinin dövlət və ictimai münasibətlər, biznes-iqtisadiyyat fakültələri yerləşir.

Digər yeni korpusda ADA Universitetinin 2019-cu ildə fəaliyyətə başlayan kollec tipli ADA Məktəbi qərar tutub.

ADA Universiteti 2014-cü il yanvarın 13-də Xarici İşlər Nazirliyinin Diplomatik Akademiyasının və İnformasiya Texnologiyaları Universitetinin əsasında yaradılıb, Xarici İşlər Nazirliyinin nəzdində fəaliyyət göstərir.