Koronavirusun yarım ili
Avqustun 31-i Azərbaycanda koronavirus infeksiyasına yoluxanların sayı 36435 nəfərə çatıb. Nazirlər Kabineti yanında operativ qərargahın hesabatına görə, onların 534-ü dünyasını dəyişib, 2054-ü müalicə olunur, qalanları sağalıb.
2019-cu ilin dekabrında Çində üzə çıxaraq dünyanı bürüyən koronavirus xəstəliyinə Azərbaycanda ilk yoluxma bu il fevralın 28-də qeydə alınıb, ay ümumilikdə 3 yoluxma ilə bitib.
Martda 295 yoluxma, 5 ölüm rəsmiləşib.
Digər ayların göstəriciləri belədir:
aprel – 1506 yoluxma, 19 ölüm;
may – 3690 yoluxma, 39 ölüm;
iyun – 12030 yoluxma, 150 ölüm;
iyul – 14354 yoluxma, 235 ölüm;
avqust – 4557 yoluxma, 86 ölüm.
Ölkədə koronavirus infeksiyasını cilovlamaq üçün xüsusi karantin rejimi tətbiq olunur. Kütləvi tədbirlərin, toy, nişan və bu kimi şənlik məclislərinin təşkilinə; əyləncə məkanlarının, kinoteatrların, teatrların, idman zallarının fəaliyyətinə; dəfn istisna olmaqla yas mərasimlərinin təşkilinə qadağa var. Ölkə ərazisinə giriş-çıxış, ölkədə gediş-gəliş məhdudiyyətləri var, tibb müəssisələrində müalicə alan şəxslərin ziyarəti; idman, sağlamlıq-bərpa üzrə xidmətlər, masaj və hamam xidmətləri yasaqdır.
Bakı, Sumqayıt şəhərləri və Abşeron rayonunda sərt karantin rejimi çərçivəsində iri ticarət mərkəzləri qapadılıb, ictimai iaşə obyektlərində müştərilərə yalnız açıq hava şəraitində xidmət mümkündür, Bakı metrosu işləmir.
