Biz yaxşı bilirik…
Azər Qasımlı
Baş verən son hadisələrin islahatla, dövlətçilik və milli təhlükəsizliklə heç bir əlaqəsi yoxdur. Yaşananlar hakimiyyətdaxili mübarizənin və ziddiyyətlərin növbəti təzahürüdür. 2016-cı ilin konstitusiya referendumundan bəri ölkədə siyasi-iqtisadi sistemin bir formadan başqa bir formaya keçidi baş verir. Bu keçidin əsas məğzi bütün resursları bir əldə cəmləşdirməkdir. Söhbət bir tərəfdən siyasi və iqtisadi resursların, digər tərəfdən xarici əlaqələrin monopoliyaya alınmasından gedir. Siyasi çəkisi və iqtisadi gücü, xarici əlaqələri olan oliqarxlar vurulur. Yerinə isə superoliqarx sistemi gəlir.
Azərbaycan xalqına, ölkəmizdə həqiqi islahatlar istəyən vətəndaşlara, müsbət dəyişiklikləri arzulayan, öz potensialını, bilik və bacarığını ölkəmiz üçün xərcləməyə hazır olan, korrupsiya əməllərində iştirak etməmiş, korrupsionerlərlə oturub-durmayan, sözün əsl mənasında təmiz bioqrafiyası olan, ağı qaradan seçməyi bacaran müasir düşüncəli insanlara, yeni nəslin nümayəndələrinə və gənclərə hakimiyyət daxilində baş verən qarşıdurmanın aidiyyəti yoxdur. Çünki bu qarşıdurmada iştirak edənlərin istinasız hamısı on illərdir ki, hakimiyyətdədirlər, bugünkü korrupsioner sistemi yaradıb, idarə edib, onun simvoluna çevrilib ondan yararlananlardır. Azərbaycan xalqını isə hər zaman olduğu kimi hansısa tərəfin əl çalanı kimi görmək istəyirlər. Lakin məsələnin mahiyyətini anlayan və ölkədə dəyişikliyi edəcək insanları və sosial zümrəni yanılda bilməyəcəklər. Biz yaxşı bilirik ki, bu “yenilik” imitasiyaları özündə azadlıqları və demokratik dəyişiklikləri gətirmək məqsədini güdmür.
Müəllifin başqa yazısı:
