Bankla müqavilə işi: Konstitusiya Məhkəməsi rəy verdi
Konstitusiya Məhkəməsinin Plenumu Nəsimi Rayon Məhkəməsinin müraciəti əsasında Mülki Məcəllənin 407.2-ci maddəsini şərh edib.
Novator.az-ın məlumatına görə, Nəsimi Rayon Məhkəməsinin müraciətində qeyd olunub ki, 15 aprel 2020-ci ildə Ramiz Daşdiyevlə “Kapital Bank” arasında kredit müqaviləsi bağlanıb. Müqavilə Daşdiyev banka getmədən, elektron sənəd mübadiləsi yolu ilə rəsmiləşdirilib, sonradan o, “Kapital Bank”a qarşı kredit müqaviləsinin etibarsız sayılması iddiası qaldırıb, məhkəməyə üz tutub. İddia ərizəsində bankın Mülki Məcəllənin 407.2 və 740.2-ci maddələrində müəyyən olunmuş qaydaya – müqavilənin yazılı formada bağlanması qaydasına riayət etmədiyi vurğulanıb.
Nəsimi Rayon Məhkəməsi Konstitusiya Məhkəməsindən Mülki Məcəllənin 407.2-ci maddəsinin “sadə yazılı müqavilə müvafiq qaydada imzalandığı… andan bağlanmış sayılır” müddəasının “müvafiq qaydada imzalanma” tələbinin mənasının şərh edilməsini istəyib.
Konstitusiya Məhkəməsi Plenumunun qərarına görə, Mülki Məcəllənin 407.2-ci maddəsinin “sadə yazılı müqavilə müvafiq qaydada imzalandığı… andan bağlanmış sayılır” müddəasının “müvafiq qaydada imzalanma” tələbi tərəflərin onu şəxsən, mexaniki və ya başqa surətçıxarma vasitələrinin köməyi ilə imzanın faksimilesindən, elektron imzadan və ya şəxsi imzanın başqa analoqundan istifadə etməklə imzalamasını nəzərdə tutur.
Mexaniki və ya başqa surətçıxarma vasitələrinin köməyi ilə imzanın faksimilesindən, elektron imzadan və ya şəxsi imzanın başqa analoqundan istifadə etməklə bağlanan müqavilələrin şərtləri mümkün qədər aydın, dürüst və başadüşülən olmalıdır.
