Yenilənən normalar
Nazirlər Kabineti ictimai iaşə müəssisələrinin koronavirus pandemiyası dövründə işi üzrə qərarını yeniləyib.
İyulun 6-da verilmiş qərarla müştəri qəbulu zamanı adambaşına müəyyən edilən sıxlıq normaları təsdiqlənib. Sənəd hər bir ictimai iaşə müəssisəsinin qarşısındakı lövhədə həmin müəssisənin qida qəbulu yerlərinin ümumi sahəsinin, oturacaq yerlərinin sayının, masalar arasında məsafənin, adambaşına sıxlıq normalarının göstərilməsini hökm edir. Nəzarət Qida Təhlükəsizliyi Agentliyi, Daxili İşlər Nazirliyi, Səhiyyə Nazirliyi, İqtisadiyyat Nazirliyi və yerli icra hakimiyyəti orqanlarına həvalə olunub.
Novator.az bildirir ki, avqustun 11-də yenilənən qərara əsasən, ictimai iaşə müəssisələrinin qida qəbulu zallarında, otaqlarında, habelə onların açıq hava sahələrində oturacaqların ara məsafəsi eyni masa arxasında 1 metrdən, masalar arasında məsafələr isə 2 metrdən az olmamalıdır.
2019-cu ilin dekabr ayında Çində üzə çıxaraq dünyanı bürüyən koronavirus xəstəliyinə Azərbaycanda ilk yoluxma fevralın 28-də qeydə alınıb, avqustun 11-dək 495 nəfər vəfat edib.
İnfeksiyasını cilovlamaq üçün xüsusi karantin rejimi tətbiq olunur. Sərt rejimin hökm sürdüyü Bakı, Cəlilabad, Gəncə, Masallı, Mingəçevir, Sumqayıt, Yevlax şəhərləri və Abşeron, Bərdə, Goranboy, Göygöl, Xaçmaz, Salyan rayonlarında ictimai iaşə obyektləri qapadılıb.
