AZƏRTAC-ın 1 avqust məlumatına görə, Azərbaycan nefti “AzəriLayt”ın bir barreli 44,36 dollara satılır, London birjasında brent markalı neftin bir barrelinə 43,30 dollar, Nyu-York birjasında layt markalı neftin bir barrelinə 40,27 dollar qiymət qoyulub.

Novator.az bildirir ki, avqustun 1-də neft hasilatı ilə bağlı beynəlxalq razılaşmanın növbəti mərhələsi qüvvəyə minib. Aprelin 12-də iri neft ixracatçıları – OPEK ölkələri (Anqola, Birləşmiş Ərəb Əmirlikləri, Ekvador, Ekvatorial Qvineya, Əlcəzair, İraq, İran, Konqo, Küveyt, Qabon, Liviya, Nigeriya, Səudiyyə Ərəbistanı, Venesuela) və 10 qeyri-OPEK ölkəsi (Azərbaycan, Bəhreyn, Bruney, Cənubi Sudan, Qazaxıstan, Malayziya, Meksika, Oman, Rusiya, Sudan) gündəlik hasilatı mərhələlərlə azaltmaq razılığına gəliblər. Həmin razılaşmaya görə, 2020-ci ilin avqustundan Azərbaycanın gündəlik neft hasilatı 587 min barrel olmalıdır.

Azərbaycanın 2020-ci il büdcəsində bir barrel neftin qiyməti 55 dollardan götürülüb. “AzəriLayt” yanvara 70,04, fevrala 62,15, marta 53,77, aprelə 19,43, maya 22,92, iyuna 38,14, iyula 43,02 dollarla başlayıb. Yeddi ayda Azərbaycan nefti 25,68 dollar ucuzlaşıb.