Azərbaycanlı şagird ümumrusiya olimpiadasında mükafat aldı
Rusiyanın paytaxtı Moskvanın 2033 saylı orta məktəbinin VIII sinfində oxuyan azərbaycanlı Ruslan Tələt oğlu Əliyev fizika üzrə Ümumrusiya “Kurchatov” Olimpiadasında uğur qazanıb. Novator.az-ın məlumatına görə, yarışın final mərhələsində iştirak edən Ruslan 100 şagird arasında 50 mümkün baldan 46 bal toplayaraq 3-cü yeri tutub, mükafatçı olub. “Kurchatov” Olimpiadasının protokolunda bu barədə qeyd yer alır və Rusiyanın Vahid Qeydiyyat Sisteminin internet səhifəsində yayımlanıb.
Ruslan 28 mart 2005-ci ildə Moskvada, azərbaycanlı iş adamı Tələt Əliyevin ailəsində dünyaya göz açıb. Fizika və riyaziyyat fənlərinə xüsusi maraq göstərir.
Ümumrusiya “Kurchatov” Olimpiadası 6-11-ci sinif şagirdləri arasında 2012-ci ildən hər il keçirilən nüfuzlu intellektual yarışmadır. Onun təşkilatçıları arasında “Kurçatov İnstitutu” Elmi Tədqiqat Mərkəzi, Moskva Şəhər Təhsil İdarəsi, Moskva Fizika-Texnologiya İnstitutu və Sankt-Peterburq Dövlət Universiteti də var.
Yarışmanın əsas məqsədlərindən biri şagirdlərin elmi fəaliyyətə marağını üzə çıxarıb inkişaf etdirmək, ən istedadlıları ölkənin aparıcı texniki universitetlərinin fakültələrində təhsil almağa cəlb etməkdir.
Olimpiada Rusiya Məktəbli Olimpiadaları Şurasının siyahısına daxildir, fizika üzrə I, riyaziyyat üzrə II səviyyəyə malikdir.
Belə bir nüfuzlu elmi yarışmada əldə etdiyi uğurlara görə Ruslanı təbrik edir, ona uğurlar arzulayırıq.
