İnfeksiyalı aylar
Koronavirusun Azərbaycana ayaq açmasının 5 ayı tamam olur.
Novator.az bildirir ki, 2019-cu ilin dekabrında Çində üzə çıxaraq dünyanı bürüyən koronavirus xəstəliyinə Azərbaycanda ilk yoluxma fevralın 28-də qeydə alınıb. Həmin ay ümumilikdə 3 yoluxma ilə bitib.
Martın 12-si ilk ölüm barədə məlumat verilib. Ayın sonunda ümumilikdə 298 nəfərin koronavirus infeksiyasına yoluxduğu, 5 nəfərin vəfat etdiyi açıqlanıb.
Aprel 1804 yoluxma, 24 ölüm, may 5494 yoluxma, 63 itki, iyun 17524 yoluxma, 213 itki ilə yekunlaşıb.
İyulun 27-dək ümumilikdə 30446 yoluxma müəyyən edilib, 423 xəstə dünyasını dəyişib.
Martda 5, apreldə 19, mayda 39, iyunda 150, iyulda 210 nəfər koronavirusun qurbanı olub.
İranda koronavirus xəstəliyindən 15912 nəfər ölüb.
Rusiyada 13354, Türkiyədə 5630 ölüm rəsmiləşib.
Ukrayna 1616, Qırğızıstan 1329, Moldova 748, Ermənistan 711, Qazaxıstan 585, Belarus 538, Özbəkistan 122 itki verib.
Litvada 80, Estoniyada 69, Tacikistanda 60, Latviyada 31, Gürcüstanda 16 koronavirus qurbanı qeydə alınıb.
Azərbaycanda koronavirus infeksiyasını cilovlamaq üçün tətbiq olunan xüsusi karantin rejimi ölkə ərazisinə giriş-çıxışa; Bakı, Sumqayıt, Gəncə, Lənkəran şəhərlərinə və Abşeron rayonuna giriş-çıxışa; təhsil müəssisələrinin fəaliyyətinə (imtahan, müsabiqə və müsahibələr istisna olmaqla); dövlət orqanlarında vətəndaşların yerində qəbuluna; dəfn istisna olmaqla yas mərasimlərinə; bütün kütləvi tədbirlərə, o cümlədən toy mərasimlərinə yasaqlar və başqa məhdudiyyətlər nəzərdə tutur.
Bakı, Sumqayıt, Gəncə, Yevlax, Masallı, Cəlilabad, Mingəçevir şəhərlərinin və Abşeron, Bərdə, Siyəzən, Şəki, Xaçmaz, Goranboy, Göygöl rayonlarının ərazisində həmçinin iri ticarət mərkəzlərinin fəaliyyəti, ictimai iaşə obyektlərində müştərilərə yerində xidmətlər yasaqdır. Vətəndaşların evdən çıxması icazə sisteminə bağlanıb.
