Sədr kürsüsünü qorudu
Ədalət və İnkişaf Partiyasından millət vəkili Mustafa Şentop iyulun 7-də yenidən Türkiyə Böyük Millət Məclisinin sədri seçilib.
Novator.az bildirir ki, 1968-ci il təvəllüdlü Mustafa Şentop İstanbul və Mərmərə universitetlərində hüquq təhsili alıb. 1993-cü ildən Mərmərə Universitetində dərs deyib, professor elmi dərəcəsinə qədər yüksəlib.
İqtisadi və Sosial Araşdırmalar Mərkəzinin İstanbul şöbəsinə başqanlıq edib, Ədalət və İnkişaf Partiyası sədrinin müavini postunu tutub. 2011-ci ildən parlamentin deputatıdır. 2018-ci ildən parlament sədrinin müavini olub, 2019-cu il fevralın 24-də Türkiyə Böyük Millət Məclisinin sədri seçilib.
Türkiyənin indiki parlamenti 24 iyun 2018-ci il seçkisində formalaşıb. Həmin il iyulun 12-dən 2019-cu ilin fevralınadək qanunverici orqana Binəli Yıldırım sədrlik edib. Türkiyə Konstitusiyasına görə, parlament səlahiyyət müddətinin üçüncü ili ərəfəsində sədri yenidən seçməlidir.
Prezident Rəcəb Teyyub Ərdoğanın sədrlik etdiyi Ədalət və İnkişaf Partiyası parlamentdə 291 mandatla təmsil olunur.
Cümhuriyyət Xalq Partiyasının 138, Xalqların Demokratik Partiyasının 58, Milliyyətçi Hərəkat Partiyasının 49, Yaxşı Partiyanın 37, Türkiyə Fəhlə Partiyasının 2, Böyük Birlik, Demokrat, Demokratik Bölgələr, Demokratiya və Sıçrayış, Səadət partiyalarının hərəyə 1 mandatı var. 6 deputat partiyasızdır.
