Nazirlər Kabineti “Koronavirus pandemiyası dövründə ictimai iaşə müəssisələrinə müştəri qəbulu zamanı adambaşına müəyyən edilən sıxlıq normaları”nı təsdiqləyib.

İyulun 6-da verilən qərara görə, ictimai iaşə müəssisələrinə müştəri qəbulu qüvvədəki norma və qaydalardan 2 dəfə az olmalı və hər adambaşına müəyyən edilən sahə ikiqat artırılmalı; qida qəbulu zallarında oturacaqların ara məsafəsi eyni masa arxasında 1 metrdən, masalar arasında məsafələr 2 metrdən az olmamalıdır.

Sənəd hər bir ictimai iaşə müəssisəsinin qarşısındakı lövhədə həmin müəssisənin qida qəbulu yerlərinin (zallar, otaqlar və s.) ümumi sahəsinin, oturacaq yerlərinin sayının, masalar arasında məsafənin, adambaşına müəyyən edilən sıxlıq normalarının göstərilməsini hökm edir.

Qida Təhlükəsizliyi Agentliyi, Daxili İşlər Nazirliyi, Səhiyyə Nazirliyi, İqtisadiyyat Nazirliyinə və yerli icra hakimiyyəti orqanlarına qərardan irəli gələn məsələləri həll etmək tapşırılıb.