Koronavirus pandemiyasından zərər çəkən sahibkarlara maliyyə dəstəyi üzrə yeni hesabat yayılıb. İqtisadiyyat Nazirliyinin məlumatına görə, iyulun 1-nə muzdlu işçilərin əməkhaqqının müəyyən hissəsinin ödənməsi üçün 28 min 851 vergiödəyicisi, maliyyə dəstəyi almaq üçün 117 min 529 fərdi (mikro) sahibkar müraciət edib.

24 min 273 vergiödəyicisinə 210 min 653 nəfər muzdlu işçinin əməkhaqqı üzrə 95,14 milyon manat köçürüldüyü vurğulanır.

Hesabata əsasən, iyulun 1-nə 62,98 milyon manat vəsaitin 105 min 638 fərdi (mikro) sahibkarın bank hesabına köçürülməsi təmin olunub.

Novator.az bildirir ki, koronavirus pandemiyasından zərər çəkən sahələri qorumaq üçün Vergi Məcəlləsinə dəyişikliklər edilib, vergilərin hesablanması və ödənməsinin şərtləri yenilənib.

2020-ci il yanvarın 1-dən bir il müddətinə tətbiq edilən müddəalar turizm sektorunu, mehmanxana (hotel) və mehmanxana tipli obyektləri; avtomobil nəqliyyatı vasitələri ilə sərnişin daşımaları, malların satıcılardan alıcılara daşınması və (və ya) çatdırılması, ictimai iaşə və başqa fəaliyyət sahələrini əhatə edib.

Sosial sığorta yükü də 1 aprel 2020-ci ildən yüngülləşdirilib.

İşsiz və koronavirus pandemiyasına görə tətbiq olunan xüsusi karantin rejimi üzündən işini itirən şəxslər aprel-may aylarında rəsmi yaşayış minimumu – 190 manat məbləğində birdəfəlik ödəmə alıb. Rəsmi hesabata əsasən, birdəfəlik ödəmə 600 min şəxsi əhatə edib.

Nazirlər Kabinetinin 23 iyun qərarına əsasən, Bakı, Sumqayıt, Gəncə, Lənkəran şəhərləri və Abşeron, Yevlax, Cəlilabad, Masallı rayonları üzrə 190 manat məbləğində birdəfəlik ödəməni almış şəxslərə eyni məbləğdə birdəfəlik ödəmə veriləcək.