Polis mükafatları
Prezident İlham Əliyev Daxili İşlər Nazirliyinin üç zabitinə ali xüsusi rütbələr verib. İyulun 1-də imzalanan sərəncamla polis general-mayoru Seyfulla Səttar oğlu Əzimov polis general-leytenantı ali xüsusi rütbəsi, polis polkovnikləri Teymur Kamil oğlu Hacıyev və Nurullah Abdulla oğlu Məmmədxanlı polis general-mayoru ali xüsusi rütbəsi alıblar.
Daxili İşlər Nazirliyinin bir qrup əməkdaşı isə “Vətən uğrunda” və “İgidliyə görə” medalları ilə təltif olunublar.
Azərbaycanda daxili işlər orqanı 102 il əvvəl, 1918-ci il iyulun 2-də yaradılıb.
Novator.az bildirir ki, Azərbaycan Xalq Cümhuriyyəti (1918-1920) dövründə 6 şəxs nazir olub.
1920-1991-ci illəri əhatə edən sovet dövründə 15 nəfər nazir postunda çalışıb (ayrı-ayrı vaxtlarda daxili işlər və təhlükəsizlik orqanları bir strukturda birləşdirilib).
Azərbaycan 1991-ci ildə müstəqilliyini bərpa edəndən 1994-cü ilə qədər 5 nəfər daxili işlər naziri təyin edilib.
1994-cü il aprelin 29-dan 2019-cu il iyunun 20-dək nazir postunu Ramil Usubov tutub. Hazırda o, Təhlükəsizlik Şurasının katibidir.
İndiki nazir Vilayət Eyvazov bu posta 2019-cu il iyunun 20-də gətirilib.
