İçərişəhərdə yeniliklər
İyunun 29-da prezident İlham Əliyev və birinci xanım Mehriban Əliyeva “İçərişəhər” Dövlət Tarix-Memarlıq Qoruğunun bir hissəsində aparılan bərpa-konservasiya işləri ilə tanış olublar. AZƏRTAC xəbər verir ki, bərpa-konservasiya işləri Mehriban Əliyevanın təşəbbüsü və onun rəhbərlik etdiyi Heydər Əliyev Fondunun dəstəyi ilə həyata keçirilib.
Novator.az bildirir ki, rəsmi arayışa görə, Bakının mərkəzində yerləşən İçərişəhər 22 hektar ərazidə amfiteatr üslubunda inşa edilib. Şəhər hündürlüyü 8-10, eni 3,5 metr olan qala divarları ilə əhatə olunub.
1977-ci ildə şəhər tarix-memarlıq qoruğu statusu alıb, 1985-ci ildə dövlət tarix-memarlıq qoruğu elan edilib.
2000-ci ildə İçərişəhər Qız Qalası və Şirvanşahlar Sarayı ilə birlikdə YUNESKO-nun Dünya Mədəni İrsi siyahısına salınıb.
2005-ci ildə İçərişəhər” Dövlət Tarix-Memarlıq Qoruğu İdarəsi yaradılıb. Hazırda bu qurum ərazidə yerləşən tarix və memarlıq abidələrinin elmi, tarixi və mədəni cəhətdən öyrənilməsinin, təbliğinin, məqsədyönlü istifadəsinin, qorunub saxlanmasının və inkişafının təmin edilməsi sahəsində fəaliyyətlə məşğul olan publik hüquqi şəxsdir.
