Yuxugörmə xatirələri bir yerə cəmləyir
Yuxunun elə bir mərhələsi var ki, həmin anlarda yatan adamın gözü sürətlə hərəkət etməyə başlayır. Hələ 1950-ci illərdə ABŞ-ın Çikaqo Universitetinin alimləri sübut ediblər ki, yuxugörmə məhz belə anlarda – gözün sürətlə hərəkət etdiyi vaxtda baş verir.
İndi isə Yaponiya alimləri sübuta yetiriblər ki, yuxugörmə xatirələr arasında əlaqələrin möhkəmlənməsinə, xatirələrin yaddaşda cəmlənib bir yerə yığılmasına kömək edir.
Novator.az-ın məlumatına görə, Yaponiya alimləri həmçinin bildiriblər ki, orta həddə fiziki iş görən, yaxud idmanla məşğul olan adamlar yaxşı yatırlar və onlarda yuxugörmə anları daha uzun sürür. Buradan isə alimlər o qənaətə gəliblər ki, orta həddə fiziki iş, yaxud idman insana xatirələrini beynində daha yaxşı cəmləməyə kömək edir.
Bu səbəbdən alimlər yaddaş problemi olan insanlara müəyyən qədər fiziki hərəkətlər etməyi məsləhət görürlər. Nəticədə onlar yatanda yuxu görə biləcəklər, bu isə xatirələr arasında beyində əlaqələri gücləndirəcək, yaddaş probleminin aradan qalxmasına təkan verəcək.
İlkin Nizami
