Operativ qərargahın 14 iyun məlumatı
Azərbaycanda daha 387 nəfər koronavirus infeksiyasına yoluxub, 274 nəfər sağalaraq xəstəxanadan buraxılıb, 4 xəstə vəfat edib. Nazirlər Kabineti yanında operativ qərargahın 14 iyun məlumatında belə deyilir.
Rəsmi hesabata görə, ölkədə ümumən 9957 yoluxma müəyyən edilib, 5583 nəfər müalicə olunaraq sağalıb, 119 nəfər dünyasını dəyişib, 4255 nəfər xəstəxanalardadır.
2019-cu ilin dekabrında Çində üzə çıxaraq 215 ölkə, ərazi və məkana yayılan koronavirus xəstəliyi 433 mindən çox adamın həyatına son qoyub.
Azərbaycanda ilk yoluxma fevralın 28-də, ilk itki martın 12-də qeydə alınıb.
Ölkədə xüsusi karantin rejimi var: sərhədlər qapadılıb; Bakı, Sumqayıt, Gəncə, Lənkəran şəhərlərinə və Abşeron rayonuna giriş-çıxış dayandırılıb; dəfn istisna olmaqla yas mərasimləri, kütləvi tədbirlər, toy, nişan və bu kimi mərasimlər yasaqlanıb, başqa məhdudiyyətlər tətbiq edilib.
Nazirlər Kabinetinin qərarına əsasən, 14-16 iyun arası Bakı, Gəncə, Lənkəran və Sumqayıt şəhərlərinin, Abşeron, Yevlax, İsmayıllı, Kürdəmir və Salyan rayonlarının ərazisində bütün iş, xidmət və ticarət sahələri üzrə fəaliyyət, ictimai nəqliyyatın və avtomobillərin hərəkəti dayandırılıb. Sakinlər yaşayış yerlərini və ya olduğu yerləri həyat və sağlamlığa bilavasitə təhlükəli vəziyyət yarandığı halda, eləcə də təxirəsalınmaz tibbi yardıma ehtiyac olduqda yalnız təcili tibbi yardım xidməti vasitəsilə, habelə yaxın qohumların dəfnində iştirak etmək üçün Daxili İşlər Nazirliyinin 102 xidməti – Zəng Mərkəzi vasitəsilə icazə almaqla tərk edə bilər.
İyunun 6-dan 8-dək Bakı, Lənkəran, Sumqayıt, Gəncə şəhərlərində və Abşeron rayonunda analoji qadağa qüvvədə olub.
