Ermənistanla razılaşma: İqbal Ağazadənin sualları var
Ermənistanın yüksək texnologiyalar sənayesi naziri Akob Arşakyan iyunun 8-i ölkə parlamentindəki çıxışında Azərbaycanla əldə olunmuş razılaşmadan danışıb. Novator.az bildirir ki, nazirin sözlərinə görə, 2019-cu ildə Azərbaycan təmsilçiləri ilə üç görüş keçirilib. O, Beynəlxalq Telekommunikasiya İttifaqının vasitəçiliyi ilə Cenevrədə baş tutan görüşlərdə sərhəddəki tezliklər məsələsinin müzakirə olunduğunu vurğulayıb, razılaşma nəticəsində Ermənistanın 134 tezlikdən sərbəst istifadə hüququ əldə etdiyini deyib.
Bu məsələni gündəmə gətirən Ümid Partiyasının sədri İqbal Ağazadə özünün “Facebook” səhifəsində Azərbaycanın nəqliyyat, rabitə və yüksək texnologiyalar naziri Ramin Quluzadəyə səslənərək suallar qoyub: “İşğal olunmuş Azərbaycan ərazilərindəki tezliklər kimin nəzarətindədir? Biz hansı tezliklərlə bağlı razılaşma əldə etmişik?”
Partiya lideri ictimaiyyəti bu məsələdə diqqətli və tələbkar olmağa çağırıb.
Ermənistan Azərbaycanın Dağlıq Qarabağ bölgəsini və Laçın, Kəlbəcər, Qubadlı, Zəngilan, Cəbrayıl, Füzuli, Ağdam rayonlarını, eləcə də Qazax rayonunun 7, Naxçıvan Muxtar Respublikasının 1 kəndini işğal edib.
1968-ci il təvəllüdlü İqbal Ağazadə Qarabağ müharibəsinin iştirakçısıdır. O, 2000-2003 və 2005-2015-ci illərdə Milli Məclisin üzvü olub.
