İrqi ayrı-seçkilik: Avropanın üzü ağdırmı?
Mayın 25-i ABŞ-da polisin qaradərili Corc Floydu öldürməsi bu ölkədə və dünyada etirazlara səbəb olub, irqi ayrı-seçkilik məsələsini yenidən gündəmə gətirib.
Avropada, o cümlədən London, Paris, Berlin, Brüsseldə keçirilən aksiyalarda qitədəki irqçiliyə də qəzəb ifadə olunub. Novator.az-ın məlumatına görə, “Euronews” kanalının siyasi şərhçisi Darren Makkafri deyir ki, ABŞ-dan fərqli olaraq Avropada irqi ayrı-seçkilikdən çox da danışılmır, problemin üstündən keçilir: “Amma bu problem Avropada da var. Biz özümüzə sual verməliyik ki, ABŞ-da baş verənlərə haqlı olaraq etirazlarımız fonunda əməllərimiz nədir?”
“Euronews” İrqçiliyə Qarşı Avropa Şəbəkəsinin qaradərililərin siyasi sistemdə təmsilçiliyi ilə bağlı araşdırmasına əsaslanaraq qeyd edir ki, 2019-cu ildə seçilmiş Avropa Parlamentində irqi azlıqların 36 nümayəndəsi yer alır, onların 6-sı qaradərilidir.
1957-ci ildə yaradılmış Avropa İttifaqının 27 üzvü var: Almaniya, Avstriya, Belçika, Bolqarıstan, Çexiya, Danimarka, Estoniya, Finlandiya, Fransa, Xorvatiya, İrlandiya, İspaniya, İsveç, İtaliya, Kipr, Latviya, Litva, Lüksemburq, Macarıstan, Malta, Niderland, Polşa, Portuqaliya, Rumıniya, Slovakiya, Sloveniya, Yunanıstan.
705 nəfərlik Avropa Parlamenti Avropa İttifaqının qanunverici orqanıdır. Quruma son seçki 2019-cu ilin may ayında keçirilib.
İrqçiliyə Qarşı Avropa Şəbəkəsinin qeyd etdiyinə görə, irqi azlığa məxsus 36 yer Avropa Parlamentinin 4-5%-i deməkdir. Halbuki etnik azlıqlar Avropa İttifaqı əhalisinin 10%-ni təşkil edir…
İlkin Nizami
