Günəşə bənzəyən yeni ulduz kəşf olunub
Günəş sisteminin daxil olduğu, Süd Yolu adlanan qalaktikamızda təxminən Saturn planeti ölçüsündə yeni ulduz kəşf olunub.
Novator.az saytı “Euronews” kanalına istinadla bildirir ki, Günəşə bənzəyən həmin ulduz Yerdən 600 işıq ili uzaqdadır. Ulduzun cazibə qüvvəsi, bu səbəbdən də kifayət qədər kütləsi var. O, işıq və istilik verir. Bu cəhətlər göy cismini ulduz kimi qiymətləndirməyə əsas yaradır.
Yeni ulduz Süd Yolu qalaktikasında ən kiçik ulduz sayılır.
Bizim qalaktikada qeydə alınan 100 milyard ulduzun təxminən yarısının ölçüsü Günəşin dörddə biri qədər və daha kiçikdir. Ən kiçik ulduzun radiusu təqribən 49 min kilometrdir. Günəşin radiusu isə 700 min kilometrdir.
Kiçik ulduzları alimlər bir qayda olaraq daha böyük ulduzun önünə keçəndə kəşf edir. Bir planet qarşısından keçəndə böyük ulduzdan gələn işıq qismən tutulur və bu da həmin kiçik planetin kəşfinə imkan yaradır. Belə planetlərə exoplanetlər deyilir. Alimlər qalaktikamızda Yerə bənzər dünyalar axtardıqları üçün exoplanetlər astronomiyada ən çox müzakirə olunan planetlərdir.
İlkin Nizami
