Uşaqlarla bağlı dövlət planı
Prezident İlham Əliyev iyunun 2-də sərəncam imzalayaraq Azərbaycanın uşaqlara dair strategiyasını təsdiqləyib. 2020-2030-cu illəri əhatə edən strategiyanın həyata keçirilməsində əlaqələndirici orqan kimi Ailə, Qadın və Uşaq Problemləri üzrə Dövlət Komitəsi seçilib. Nazirlər Kabinetinə strategiyanın 2020-2025-ci illərdə icrası üzrə fəaliyyət planı layihəsini 3 ay müddətində hazırlamaq tapşırılıb.
Novator.az-ın məlumatına görə, strategiyanın prioritet istiqamətləri belə sıralanır:
– uşaq hüquqlarının təmin edilməsinə dövlət nəzarəti mexanizminin təkmilləşdirilməsi;
– yetkinlik yaşına çatmayanların işləri və hüquqlarının müdafiəsi üzrə komissiyaların və yerli icra hakimiyyətlərinin qəyyumluq və himayə orqanlarının fəaliyyətini tənzimləyən normativ hüquqi bazanın və institusional strukturun təkmilləşdirilməsi;
– uşaq hüquqlarının müdafiəsi, onların problemlərinin həlli sahəsində beynəlxalq təcrübənin öyrənilməsi və bu istiqamətdə mütəxəssislərin hazırlanması;
– uşaqların təhsilə çıxışında bərabərliyin təmin edilməsi istiqamətində qanunvericiliyin təkmilləşdirilməsi;
– çətin şəraitdə yaşayan uşaqların aşkarlanması və onlar barəsində təxirəsalınmaz sosial müdafiə tədbirləri üçün işlək mexanizmin yaradılması;
– baxımsız və sosial təhlükəli vəziyyətdə olan uşaqların reabilitasiyası və cəmiyyətə inteqrasiyası sahəsində qanunvericiliyin təkmilləşdirilməsi;
– alternativ qayğı xidmətlərinin (himayədar (foster) qayğı xidməti, ailə tipli kiçik qrup evi) tətbiqi və inkişaf etdirilməsi ilə bağlı qanunvericiliyin təkmilləşdirilməsi və bu sahədə beynəlxalq təcrübəyə əsaslanan tələblərin müəyyənləşdirilməsi;
– uşaqlara qarşı zorakılıq hallarının qarşısının alınması ilə bağlı qanunvericiliyin təhlili və təkmilləşdirilməsi;
– ədalət mühakiməsinin həyata keçirilməsi zamanı uşaq hüquqlarının qorunması ilə bağlı qanunvericiliyin təhlili və təkmilləşdirilməsi.
Nazirlər Kabineti ildə bir dəfə prezidentə strategiyanın icrası barədə hesabat verməlidir.
Strategiyanın icrasından gözlənən nəticələr bunlardır: uşaq hüquqlarının müdafiəsi ilə bağlı çevik institusional mexanizmin formalaşdırılması; erkən yaş dövründə uşaqların fiziki və psixoloji inkişafı ilə bağlı tədbirlərin effektivliyinin artırılması; xüsusi qayğıya ehtiyacı olan uşaqların daha keyfiyyətli təhsillə, tibbi və sosial xidmətlərlə əhatə olunması; çətin həyat şəraitində olan ailələrin uşaqlarının sosial müdafiəsinin daha da gücləndirilməsi; uşaqların istedadlarının və bacarıqlarının inkişaf etdirilməsi, onların milli-mənəvi ruhda tərbiyə edilməsi istiqamətində tədbirlərin səmərəliliyinin artırılması.
Ailə, Qadın və Uşaq Problemləri üzrə Dövlət Komitəsinə Bahar Muradova sədrlik edir. 1962-ci il təvəllüdlü Bahar Muradova Azərbaycan Dövlət Universitetinin filologiya fakültəsini və Azərbaycan Universitetinin hüquq fakültəsini bitirib.
2000-2020-ci illərdə Milli Məclisin deputatı, 2005-ci ildən parlament sədrinin müavini olub.
Yeni Azərbaycan Partiyası İdarə Heyətinin üzvüdür.
