Paşinyan və ailə üzvləri koronavirusa yoluxub
Ermənistanın baş naziri Nikol Paşinyan koronavirus infeksiyasına yoluxduğunu açıqlayıb. Novator.az-ın məlumatına görə, baş nazir iyunun 1-də özünün “Facebook” səhifəsində canlı efirə çıxaraq deyib ki, cəbhə bölgəsinə yollanmaq istədiyi üçün mayın 31-də koronavirus testindən keçib: “Test mənim koronavirus infeksiyasına yoluxduğumu ortaya çıxardı. Ailə üzvlərim də yoluxub”.
Nikol Paşinyan bir müddət ev şəraitində çalışacağını vurğulayıb.
2019-cu ilin dekabrında Çində üzə çıxaraq dünyanı bürüyən koronavirus xəstəliyi 373 mindən çox adamın həyatına son qoyub. Ermənistanda 9282 nəfər koronavirusa yoluxub, 131 nəfər ölüb.
1975-ci ildə Ermənistanın İcevan şəhərində doğulan Nikol Paşinyan əsası 2013-cü ildə qoyulmuş Vətəndaş Sazişi Partiyasının lideridir. 2017-ci ilin parlament seçkisində Vətəndaş Sazişi Partiyası daha iki partiya ilə birgə “Çıxış” bloku yaradıb. Blok 105 nəfərlik parlamentə 9 mandat qazanıb.
2018-ci il martın 31-dən Nikol Paşinyan Ermənistanda prezident Serj Sərkisyanın baş nazir olmaq niyyətinə qarşı xalq hərəkatına başçılıq edib. Aprelin 9-da Serj Sərkisyanın prezident səlahiyyətləri başa çatıb. Həmin gün ölkə parlament idarə üsuluna keçdiyi üçün icra hakimiyyətinə rəhbərlik baş nazirə ötürülüb. Aprelin 17-də Serj Sərkisyan baş nazir kürsüsünə oturub, ancaq aprelin 23-də xalq etirazlarına tab gətirməyərək istefa verib. Mayın 8-dən baş nazir postuna Nikol Paşinyan keçib.
2018-ci il dekabrın 9-da keçirilmiş növbədənkənar parlament seçkisində Nikol Paşinyanın “Mənim addımım” bloku qələbə qazanaraq hökumət qurub.
Nikol Paşinyanın həyat yoldaşı Anna Akopyan “Aykakan jamanak” qəzetinin baş redaktorudur. Onların oğlu Aşot Paşinyan 2018-ci ilin iyul ayından Dağlıq Qarabağda hərbi xidmət keçir. Ailənin üç qızı var.
