Nazir cəbhə bölgəsində
Azərbaycan Ordusu mayın 18-dən genişmiqyaslı əməliyyat-taktiki təlimlər keçirir. Təlimlərdə döyüş hazırlığı, əməliyyatların planlaşdırılması və hərtərəfli təminatı, müxtəlif qoşun növləri və qisimlərinin idarəetmə orqanlarının qarşılıqlı əlaqəsi, həmçinin zərbə qruplaşmalarının atəş və manevr imkanları yoxlanır. 10 min nəfərədək şəxsi heyət, 120-dək tank və digər zirehli texnika, 200-dək müxtəlif çaplı raket və artilleriya qurğusu, reaktiv yaylım atəş sistemi və minaatanlar, 30-dək ordu və cəbhə aviasiyası və müxtəlif təyinatlı pilotsuz uçuş aparatları cəlb olunan təlimlər mayın 22-dək davam edəcək.
Mod.gov.az-ın 20 may məlumatına görə, təlimlər çərçivəsində cəbhə bölgəsinə gedən müdafiə naziri general-polkovnik Zakir Həsənov komanda idarəetmə məntəqəsində olub. Qoşunların döyüş fəaliyyətinin təşkilini yoxladıqdan sonra nazir əməliyyatların planlaşdırılması, təminat, döyüşü idarəetmə, artilleriya, kəşfiyyat, hava hücumundan müdafiə və digər qoşun növlərinin idarəetmə qruplarına baş çəkib, idarəetmə orqanlarının fəaliyyəti ilə bağlı göstərişlər verib.
Nazir cəbhə zonasında yerləşən hərbi hissələrdəki hərbi texnikanın döyüş qabiliyyətini yoxlayıb, Ermənistan silahlı qüvvələrinin üzbəüz yerləşən mövqelərini müşahidə edib və tapşırıqlar qoyub.
