İsa Qəmbərin Paşinyana cavabı
Mayın 16-sı Yerevanda mətbuat konfransı keçirən Ermənistanın baş naziri Nikol Paşinyan deyib ki, azərbaycanlıların bir qismi 1941-1945-ci illərin Almaniya-SSRİ müharibəsində almanlar tərəfdən döyüşüb. O, faşist Almaniyası tərəfdən döyüşən Azərbaycan legionunun yaradılmasında Məhəmməd Əmin Rəsulzadənin xüsusi rol oynadığını iddia edib.
Məhəmməd Əmin Rəsulzadə Azərbaycan Xalq Cümhuriyyətinin qurucu lideridir.
1884-cü il yanvarın 31-də doğulan Məhəmməd Əmin Rəsulzadə 1903-cü ildə Azərbaycanlı Gənc İnqilabçılar Dərnəyini yaradıb. 1904-cü ildə Rusiya Sosial Demokrat Fəhlə Partiyasının nəzdində “Hümmət” Sosial Demokrat Təşkilatının yaradıcılarından olub. 1907-ci ildə RSDFP-dən uzaqlaşıb rus müstəmləkə üsul-idarəsinə qarşı fəaliyyətə başlayıb.
1911-ci ildə Müsavat Partiyasının qurulmasında iştirak edib. Partiyanın ilk başqanı olub. 1918-ci ildə Azərbaycanın müstəqilliyini bəyan edən Milli Şuraya sədrlik, daha sonra Azərbaycanın ilk parlamentində Müsavat fraksiyasına başçılıq edib.
1920-ci ildə bolşeviklər Azərbaycanı işğal edəndə həbs olunub, azadlığa çıxandan sonra Moskvada yaşayıb. 1922-ci ildə Finlandiyaya, oradan Fransaya, sonra Türkiyəyə gedib. 1955-ci il martın 6-sı Ankarada vəfat edib, “Əsri” qəbiristanlığında dəfn olunub.
Novator.az-ın məlumatına görə, Azərbaycan parlamentinin sabiq sədri, Müsavatın keçmiş başqanı, partiya Məclisinin üzvü İsa Qəmbər Nikol Paşinyanın Azərbaycan Cümhuriyyətinin və Müsavat Partiyasının qurucusuna böhtan atdığını bəyan edib. O, “Facebook” səhifəsində yazıb ki, Azərbaycan ziyalıları, tarixçi alimlər, Müsavat Partiyası rəhbərliyi, başqa siyasətçilər Paşinyana tutarlı cavablar verib, onun cəfəngiyatını elmi sübutlarla darmadağın ediblər: “Mən məsələnin başqa bir cəhətinə diqqət cəlb etmək istəyirəm. 2018-ci ilin birinci yarısında hakimiyyətə gələn Paşinyan mürəkkəb daxili və beynəlxalq amillərin nəticəsində unikal bir şans əldə etmişdi. O, korrupsiya və monopoliyaları, repressiya və saxtakarlığı aradan qaldıraraq, Qarabağ məsələsində gerçəkçi bir mövqe tutaraq, saxta soyqırımı manipulyasiyasına son qoyaraq Ermənistanı böhran vəziyyətindən çıxara, Azərbaycan və Türkiyə ilə normal qonşuluq münasibətlərinə start verə və ölkəsinin Avropaya həqiqi inteqrasiyasına nail ola bilərdi.
Lakin yarımçıq, diletant və populist fəaliyyəti ilə bütün bu imkanları demək olar ki, itirən Paşinyan üstəlik son dövrdə davranışları ilə, “İnsanlara hürriyyət, millətlərə istiqlal” şüarının və ümumi Qafqaz evi ideyasının əsas müəllifi Məhəmməd Əmin Rəsulzadəyə qərəzli hücumları ilə siyasətdə və dövlət idarəetməsində təsadüfi bir fiqur olduğunu ortaya qoymuş oldu”.
1957-ci il təvəllüdlü İsa Qəmbər milli azadlıq hərəkatının liderlərindəndir. 1990-1995-ci illərdə parlamentin deputatı, 1992-1993-cü illərdə Milli Məclisin sədri olub, 1992-ci il mayın 18-dən iyunun 17-dək prezident səlahiyyətlərini icra edib. 1992-2014-cü illərdə Müsavat Partiyasının başqanı postunu tutub.
1975-ci il təvəllüdlü Nikol Paşinyan əsası 2013-cü ildə qoyulmuş Vətəndaş Sazişi Partiyasının lideridir.
2018-ci il martın 31-dən Nikol Paşinyan Ermənistanda prezident Serj Sərkisyanın baş nazir olmaq niyyətinə qarşı xalq hərəkatına başçılıq edib. Aprelin 9-da Serj Sərkisyanın prezident səlahiyyətləri başa çatıb. Həmin gün ölkə parlament idarə üsuluna keçdiyi üçün icra hakimiyyətinə rəhbərlik baş nazirə ötürülüb. Aprelin 17-də Serj Sərkisyan baş nazir kürsüsünə oturub, ancaq aprelin 23-də xalq etirazlarına tab gətirməyərək istefa verib. Mayın 8-dən baş nazir postuna Nikol Paşinyan keçib.
