1789 sağalan var
Nazirlər Kabineti yanında operativ qərargahın 13 may məlumatına görə, Azərbaycanda daha 65 nəfər koronavirus infeksiyasına yoluxub, 54 nəfər sağalaraq xəstəxanadan buraxılıb, 1949 və 1961-ci il təvəllüdlü iki xəstə dünyasını dəyişib.
Ümumilikdə yoluxanların sayı 2758 göstərilir. Rəsmi açıqlamaya əsasən, onların 1789-u müalicə olunaraq sağalıb, 35-i vəfat edib, 934-ü xəstəxanalardadır.
2019-cu ilin dekabrında Çində üzə çıxan koronavirus xəstəliyi 213 ölkə və əraziyə yayılıb, 294 mindən çox adam ölüb.
Azərbaycanda infeksiyanı cilovlamaq məqsədilə sərhədlər qapadılıb, təhsil ocaqları, mədəniyyət və idman obyektləri bağlanıb, ictimai iaşəyə, ticarətə, ölkə ərazisində gediş-gəlişə, ictimai nəqliyyatın hərəkətinə, insanların evdən çıxmasına məhdudiyyətlər tətbiq olunub, toy və şənlik məclisləri, dəfn çıxılmaqla yas mərasimlərinin keçirilməsi yasaqlanıb.
