143 yoluxma, 3 ölüm
Azərbaycanda daha 143 nəfər koronavirus infeksiyasına yoluxub, 44 nəfər sağalaraq xəstəxanadan buraxılıb, 1942, 1944 və 1956-cı il təvəllüdlü 3 nəfər vəfat edib.
Nazirlər Kabineti yanında operativ qərargahın 9 may hesabatına görə, ümumilikdə 2422 nəfərdə koronavirus aşkarlanıb, onların 1620-si sağalıb, 31-i dünyasını dəyişib.
Xəstəxanalarda 771 nəfərin olduğu bildirilir.
2019-cu ilin dekabrında Çində üzə çıxan koronavirus xəstəliyi 212 ölkə və əraziyə yayılıb, 276 mindən çox adam ölüb.
Azərbaycanda infeksiyanı cilovlamaq məqsədilə sərhədlər qapadılıb, təhsil ocaqları, mədəniyyət və idman obyektləri bağlanıb, ictimai iaşə və ticarət sektorlarında, ölkə ərazisində gediş-gəlişə, ictimai nəqliyyatın hərəkətinə, insanların evdən çıxmasına məhdudiyyətlər tətbiq olunub, toy və şənlik məclisləri, dəfn çıxılmaqla yas mərasimlərinin keçirilməsi yasaqlanıb.
