Xəstəxanalarda 675 nəfər var
Nazirlər Kabineti yanında operativ qərargahın 8 may məlumatına görə, Azərbaycanda daha 75 nəfər koronavirus infeksiyasına yoluxub, 25 nəfər sağalaraq xəstəxanadan buraxılıb.
Ümumilikdə 2279 yoluxmanın müəyyən edildiyi, 1576 nəfərin müalicə olunaraq sağaldığı, 28 nəfərin dünyasını dəyişdiyi bildirilir.
Hesabata əsasən, xəstəxanalarda 675 nəfər var.
Başqa bir məlumatda qeyd olunur ki, martın 31-dən bağlanan Bakı Metropoliteni mayın 9-dan fəaliyyətini bərpa edir: “Metro stansiyalarına yalnız yaşayış yerini SMS icazə ilə, İcaze.e-gov.az portalında qeydiyyatdan keçməklə, xidməti vəsiqə və ya iş yeri barədə arayışla tərk edən sərnişinlərin girişinə icazə veriləcək. Sərnişinlərin metro stansiyası ərazisində, eləcə də qatarlarda qoruyucu maskalardan istifadəsi və sosial məsafəni gözləməsi mütləqdir”.
2019-cu ilin dekabrında Çində üzə çıxan koronavirus xəstəliyi 212 ölkə və əraziyə yayılıb, 271 mindən çox adam ölüb.
Azərbaycanda infeksiyanı cilovlamaq məqsədilə sərhədlər qapadılıb, təhsil ocaqları, mədəniyyət və idman obyektləri bağlanıb, ictimai iaşə və ticarət sektorlarında, ölkə ərazisində gediş-gəlişə, ictimai nəqliyyatın hərəkətinə, insanların evdən çıxmasına məhdudiyyətlər tətbiq olunub, toy və şənlik məclisləri, dəfn çıxılmaqla yas mərasimlərinin keçirilməsi yasaqlanıb.
