Ədliyyə Nazirliyi Bədrəddin Quliyevin sədrlik etdiyi Cümhuriyyət Xalq Partiyasını və Əflan İbrahimovun sədrlik etdiyi Müstəqil Xalq Partiyasını dövlət qeydiyyatına alıb. Dövlət qeydiyyatı haqqında şəhadətnamələr partiya rəhbərlərinə mayın 7-də təqdim olunub.

Aprelin 16-da Azad Demokratlar Partiyası (sədri Sülhəddin Əkbərdir) və Yeni Zaman Partiyası (sədri Musa Ağayevdir) ilə də bağlı eyni addım atılmışdı.

Novator.az bildirir ki, Azərbaycanda siyasi partiyaların dövlət qeydiyyatına alınması üçün azı 1000 vətəndaş onun üzvü olmalıdır.

İndiyədək 59 partiya dövlət qeydiyyatına alınıb.

1992-ci il iyunun 3-də siyasi partiyalar qanunu qəbul ediləndən bəri ən çox partiyanın dövlət qeydiyyatına alındığı il həmin il olub. 1992-ci ildə 10 partiya dövlət qeydiyyatına götürülüb.

1993-ci ildə 8 partiya, 1994-cü ildə 5 partiya, 1995-ci ildə 7 partiya, 1998 və 1999-cu illərin hər birində 3 partiya, 2000-ci ildə 2 partiya, 2002-ci ildə 4 partiya, 2005-ci ildə 8 partiya, 2007-ci ildə 2 partiya, 2008, 2009 və 2011-ci illərin hər birində 1 partiya rəsmiləşib.