Neft-qaz layihələrindən nə gəlir var?
Dövlət Neft Fondu 2020-ci ilin yanvar-aprel aylarında Xəzərin Azərbaycan sektorundakı “Azəri-Çıraq-Günəşli” neft-qaz yataqları blokunun işlənməsi layihəsindən 1 milyard 983 milyon dollar gəlir əldə edib. Mayın 4-də yayılan rəsmi xəbərdə o da qeyd olunur ki, dörd ayda “Şahdəniz” yatağı üzrə kondensatın satışından 112 milyon dollar götürülüb.
AZƏRTAC-ın 4 may məlumatına görə, London birjasında brent markalı neftin bir barreli 25,97 dollara, Nyu-York birjasında layt markalı neftin bir barreli 18,38 dollara satılır.
Azərbaycanın 2020-ci il büdcəsində bir barrel neftin qiyməti 55 dollardan götürülüb. “AzəriLayt” markalı Azərbaycan nefti yanvara 70,04, fevrala 62,15, marta 53,77, aprelə 19,43, maya 22,92 dollarla başlayıb.
Mayın 1-də neft hasilatının azaldılması üzrə beynəlxalq razılaşma qüvvəyə minib. Novator.az bildirir ki, Azərbaycan may-iyun aylarında gündəlik neft hasilatını 554 min barrel həcmində saxlamalıdır.
İyul-dekabr aylarında Azərbaycanın gündəlik hasilatı 587 min barrel, 2021-ci ilin yanvar ayından 2022-ci ilin aprelinədək isə 620 min barrel olmalıdır.
