Əli Kərimli – 55
Azərbaycan Xalq Cəbhəsi Partiyasının (AXCP) sədri Əli Kərimlinin 55 yaşı tamam olur.
Novator.az bildirir ki, Əli Kərimli 1965-ci il aprelin 28-də Saatlı rayonunun Azadkənd kəndində doğulub.
1991-ci ildə Bakı Dövlət Universitetinin hüquq fakültəsini bitirib.
Milli azadlıq hərəkatının öncül şəxslərindəndir.
1991-ci ildən “Azadlıq” qəzetinin parlament müxbiri və şərhçisi olub. Əbülfəz Elçibəyin prezidentliyi zamanı (1992-1993-cü illər) əvvəl Prezident Aparatının şöbə müdiri, sonra dövlət katibi vəzifələrində çalışıb.
1993-cü ildən AXC sədrinin müavini, daha sonra birinci müavini olub.
1995 və 2000-ci illərdə Milli Məclisin deputatı seçilib.
AXCP-yə 2000-ci ildən rəhbərlik edir, sədr postuna 2001-ci ildə seçilib.
2013-cü ildə yaradılmış Demokratik Qüvvələrin Milli Şurasının Koordinasiya Mərkəzinin üzvüdür.
1994-cü ildə bir müddət həbsdə yatıb.
Əli Kərimli ailəlidir, üç övladı var.
Azərbaycan Xalq Cəbhəsi (AXC) 1989-cu il iyulun 16-sı Bakıda təsis olunub. Qurucu konfransda Əbülfəz Elçibəy AXC sədri seçilib.
AXC-nin 1991 və 1992-ci illərdə keçirilən qurultaylarında sədr kürsüsü yenə Əbülfəz Elçibəyə qismət olub.
1992-ci il iyunun 7-də Əbülfəz Elçibəy Azərbaycan prezidenti seçilib.
1993-cü ilin iyununda AXC hakimiyyəti hərbi-siyasi qiyamla devrilib, Əbülfəz Elçibəy vəzifədən uzaqlaşdırılıb.
1995-ci ildə AXC partiyaya çevrilib və vəfat etdiyi 2000-ci ilədək sədr postunu Əbülfəz Elçibəy tutub.
