Sabit qəbzlə işləyəni nə yeniliklər gözləyir?
Hökumət Vergi Məcəlləsinə və “Sosial sığorta haqqında” qanuna dəyişikliklər təklif edərək koronavirus pandemiyasından zərər çəkən sahələrin vergi və sosial sığorta yükünün azaldılmasını istəyib.
Novator.az-ın məlumatına görə, bununla bağlı şərh yayan iqtisadçı Qalib Toğrul sabit qəbz əldə etməklə fəaliyyət göstərən vergi ödəyicilərinin sosial sığorta yükünün aprelin 1-dən azaldılmasının, bu haqqın bölgələr üzrə fərqləndirilməsinin nəzərdə tutulduğunu vurğulayır: “1 aprel 2020-ci ilədək onlar fəaliyyət yerindən asılı olmayaraq ayda eyni məbləğdə sosial ayırma ödəyiblər: 62,50 manat. Dəyişikliklər layihəsinə əsasən, sosial sığorta haqqı azalır və bölgələr üzrə fərqli olur. Toyda, şənlikdə və digər tədbirlərdə aparıcılıq, çalğıçılıq, rəqqaslıq, aşıqlıq, məzhəkəçilik fəaliyyəti göstərənlərdən minimum aylıq əməkhaqqının (250 manat) 5 faizi miqdarında sosial sığorta haqqı tutulacaq. Məsələn, tamada Bakıda (kənd və qəsəbələr də daxil olmaqla) 25 manat, Abşeron rayonunda, Sumqayıt və Gəncə şəhərlərində 18,75 manat, digər şəhər və rayonlarda 12,50 manat ödəyəcək.
Çəkməçilər, pinəçilər, məişət cihazlarının təmiri ilə məşğul olanlar, fərdi foto, audio, video xidmətləri sahəsində işləyənlər (fotostudiyalar istisna olmaqla), fərdi yaşayış evlərində və mənzillərdə qulluqçuluq edən, xəstələrə, qocalara və uşaqlara qulluq, dayə, fərdi sürücülük xidmətləri göstərən, bağbanlıq, aşpazlıq, gözətçilik edən, iaşə obyektlərində ofisiant kimi çalışan, naqqaşlıq emalatxanalarında işləyən, fərdi qaydada bərbər və dərzi fəaliyyəti ilə məşğul olan şəxslər minimum aylıq əməkhaqqının 3 faizi miqdarında sosial sığorta haqqı verəcəklər.
Məsələn, bərbər, ofisiant, gözətçi, dərzi, saatsaz, pinəçi, fotoqraf, dayə, bağban Bakıda (kənd və qəsəbələr də daxil olmaqla) 15 manat, Abşeron rayonunda, Sumqayıt və Gəncə şəhərlərində 11,25 manat, digər şəhər və rayonlarda 7,50 manat ödəyəcək.
Yuxarıdakı kateqoriyalara uyğun gələnlər məcburi dövlət sosial sığorta haqqı ödənişlərini də sabit qəbz almaqla həyata keçirəcəklər.
