İqtisadçı alim, pedaqoq, Azərbaycan Demokratiya və Rifah Hərəkatının sədri Qubad İbadoğlu tələbələrə mobil rabitə güzəşti təklif edir. Novator.az-ın məlumatına görə, Qubad İbadoğlu özünün “Facebook” səhifəsində Dövlət Statistika Komitəsinə istinadla bu ilin ilk rübündə rabitə və informasiya sektorunun gəlirlərinin 18 faiz artdığını vurğulayır: “2020-ci ilin yanvar-mart aylarında rabitə və informasiya müəssisələri 546,6 milyon manatlıq xidmət göstərib. Bunun 71,7 faizini əhali istehlak edib. Xidmətlərdən əldə edilən gəlirin 40,8 faizi və ya 223,2 milyon manatı mobil telefon rabitəsi sahəsində formalaşıb. Deməli, əhali ilin ilk rübündə rabitə və informasiya xidmətləri üçün 392 milyon manat xərcləyib, bunun da 223,2 milyon manatı üç mobil operatora ödənib.

Üç ayda bu qədər qazanan mobil operatorlar müştərilərinə hətta pandemiya dövründə heç bir güzəşt vermir. Hətta tələbələrə belə dəstək olmurlar ki, təhsillərini distant yolla davam etdirsinlər. Əksinə, borc yaranan kimi xidməti dayandırırlar.

Pandemiya dövründə başqa ölkələrdəki, məsələn, Özbəkistan, Türkiyə, Macarıstandakı mobil operator şirkətləri müştərilərinə analoji güzəştləri bir aydan çoxdur təqdim edib. Məncə, Təhsil Nazirliyi tələbələrə mobil internet güzəştinin verilməsi istiqamətində təşəbbüs göstərməli və Nazirlər Kabineti mobil operatorlara sosial məsuliyyət proqramları çərçivəsində öhdəliklərini xatırladan tövsiyə verməlidir”.

Azərbaycanda mobil rabitə xidmətini “Bakcell”, “Azercell Telekom” və “Azərfon” şirkətləri göstərir.