Sağalanların sayı 907-yə çatdı
Azərbaycanda daha 38 nəfər koronavirus infeksiyasına yoluxub, 42 nəfər sağalaraq xəstəxanadan çıxıb. Nazirlər Kabineti yanında operativ qərargah aprelin 22-də belə məlumat yayıb.
Hesabata görə, indiyədək ölkədə 1518 nəfərin koronavirusa yoluxması müəyyən edilib, onların 907-si müalicə olunaraq sağalıb, 20-si dünyasını dəyişib.
2019-cu ilin dekabrında Çində üzə çıxan, pnevmoniyanın yeni növü olan koronavirus xəstəliyi 210 ölkə və əraziyə yayılıb, 179 mindən çox adam ölüb.
Azərbaycanda infeksiyanı cilovlamaq məqsədilə xüsusi karantin rejimi tətbiq olunub: sərhədlər qapadılıb, təhsil ocaqları, mədəniyyət və idman obyektləri, ictimai iaşə müəssisələri, əksər ticarət məkanları, məişət xidməti yerləri bağlanıb, toy və şənlik məclisləri, dəfn istisna olmaqla yas mərasimlərinin keçirilməsi yasaqlanıb, ölkə ərazisində gediş-gəlişə, ictimai nəqliyyatın hərəkətinə, insanların evdən çıxmasına məhdudiyyət qoyulub.
