Prezident icra başçısına töhmət elan etdi
Aprelin 21-də prezident İlham Əliyev İsmayıllı Rayon İcra Hakimiyyətinin başçısı Nahid Bağırova töhmət elan edilməsi haqqında sərəncam imzalayıb.
İcra başçısına töhmət koronavirus infeksiyasının yayılmasının qarşısının alınması məqsədilə tətbiq olunmuş xüsusi karantin rejimi qaydalarını pozduğuna görə elan edilib.
41 yaşlı Nahid Bağırov bu il martın 5-dən İsmayıllı Rayon İcra Hakimiyyətinin başçısıdır. Onun xüsusi karantin rejimi qaydalarını hansı formada pozduğu haqda məlumat açıqlanmayıb.
2019-cu ilin dekabrında Çində üzə çıxan, pnevmoniyanın yeni növü olan koronavirus xəstəliyi 210 ölkə və əraziyə yayılıb, 171 mindən çox adam ölüb.
Azərbaycanda infeksiyanı cilovlamaq məqsədilə xüsusi karantin rejimi tətbiq olunub: sərhədlər qapadılıb, təhsil ocaqları, mədəniyyət və idman obyektləri, ictimai iaşə müəssisələri, əksər ticarət məkanları, məişət xidməti yerləri bağlanıb, toy və şənlik məclisləri, dəfn istisna olmaqla yas mərasimlərinin keçirilməsi yasaqlanıb, ölkə ərazisində gediş-gəlişə, ictimai nəqliyyatın hərəkətinə, insanların evdən çıxmasına məhdudiyyət qoyulub.
Aprelin 21-nə olan rəsmi məlumata görə, ümumilikdə ölkədə 1480 nəfər koronavirusa yoluxub, onların 865-i müalicə olunaraq sağalıb, 20-si dünyasını dəyişib.
