Aprelin 21-də Nazirlər Kabineti yanında operativ qərargah ölkədə koronavirus infeksiyası ilə əlaqədar yaranmış vəziyyətə dair açıqlama yayıb.

Açıqlamada deyilir ki, ölkədə daha 44 nəfər koronavirus infeksiyasına yoluxub, 74 nəfər sağalaraq xəstəxanadan buraxılıb, 1963-cü il təvəllüdlü bir şəxs vəfat edib.

Rəsmi hesabata görə, ümumilikdə ölkədə 1480 nəfər koronavirusa yoluxub, onların 865-i müalicə olunaraq sağalıb, 20-si dünyasını dəyişib. Hazırda xüsusi rejimli xəstəxanalarda 595 nəfər var, onların 14-nün vəziyyəti ağırdır.

2019-cu ilin dekabrında Çində üzə çıxan, pnevmoniyanın yeni növü olan koronavirus xəstəliyi 210 ölkə və əraziyə yayılıb, 171 mindən çox adam ölüb.

Azərbaycanda infeksiyanı cilovlamaq məqsədilə xüsusi karantin rejimi tətbiq olunub: sərhədlər qapadılıb, təhsil ocaqları, mədəniyyət və idman obyektləri, ictimai iaşə müəssisələri, əksər ticarət məkanları, məişət xidməti yerləri bağlanıb, toy və şənlik məclisləri, dəfn istisna olmaqla yas mərasimlərinin keçirilməsi yasaqlanıb, ölkə ərazisində gediş-gəlişə, ictimai nəqliyyatın hərəkətinə, insanların evdən çıxmasına məhdudiyyət qoyulub.