AXCP sədri Əli Kərimlidən aprelin 20-də alınmış müsahibənin videoyazısını əməkdaşlıq etdiyi “Azad Söz” internet kanalına çatdırmaq istəyən jurnalist Teymur Kərimovun döyüldüyü bildirilir. Müsahibəni alan jurnalist Fatimə Mövlamlının yaydığı məlumata görə, yaddaş kartını kanalın rəhbərliyinə çatdırması üçün Bakı Apellyasiya Məhkəməsinin qarşısında Teymur Kərimova verib.
Xəbərdə qeyd olunur ki, həmin gün Teymur Kərimov bir müddət yoxa çıxıb. Günün sonunda bəlli olub ki, Teymur Kərimovu Sabunçu rayonu ərazisində “Niva” markalı iki maşınla dörd mülki geyimli şəxs saxlayıb. Suraxanı rayonunda 9-cu mədən adlanan yerə, neft buruqları ərazisinə aparılıb döyülən jurnalistin kompüterinin və videokamerasının sındırıldığı, Əli Kərimlinin müsahibəsi yazılan yaddaş kartının əlindən alındığı bildirilir.
Bakının Süleyman Rəhimov küçəsində yaşayan Əli Kərimli aprelin 13-ü “Osmanqızı TV” internet kanalına müsahibə vermək istəyərkən problemlə üzləşib. Saat 22:30-a nəzərdə tutulan canlı yayıma 15 dəqiqə qalmış evdə internet və bütün telefon aparatlarından əlaqə kəsilib. Aprelin 14-ü səhər internet və telefon əlaqələri bərpa olunsa da, həmin gün axşamdan eyni problem yaşanır.
AXCP sədri təcridetmə əməliyyatından yazıb
