İctimai iaşə 12,9 faiz geriləyib
2020-ci ilin yanvar-mart aylarında Azərbaycanda ictimai iaşə dövriyyəsi 2019-cu ilin eyni dövrü ilə müqayisədə real ifadədə 12,9 faiz azalaraq 279,3 milyon manat olub. Novator.az-ın məlumatına görə, Dövlət Statistika Komitəsi belə hesabat yayıb.
Başqa bir rəsmi açıqlamada qeyd olunur ki, yanvar-mart aylarında əhaliyə göstərilən ödənişli xidmətlərin dəyəri 2019-cu ilin ilk rübünə nəzərən real ifadədə 5,5 faiz azalaraq 2 milyard 6,1 milyon manat həddində qərar tutub, hər bir ölkə sakini orta hesabla 201,5 manatlıq və ya ötən ilin müvafiq dövrü ilə müqayisədə nominal ifadədə 11 manat az müxtəlif ödənişli xidmətlərdən istifadə edib.
Azalmalar koronavirus pandemiyası ilə bağlı məhdudiyyətlərdən doğur.
2019-cu ilin dekabrında Çində üzə çıxan, pnevmoniyanın yeni növü olan koronavirus xəstəliyi 210 ölkə və əraziyə yayılıb, 165 mindən çox adam ölüb.
Azərbaycanda 1398 nəfər koronavirusa yoluxub, onların 712-si müalicə olunaraq sağalıb, 19-u dünyasını dəyişib. Ölkədə infeksiyanı cilovlamaq məqsədilə xüsusi karantin rejimi tətbiq olunub: sərhədlər qapadılıb, təhsil ocaqları, mədəniyyət və idman obyektləri, ictimai iaşə müəssisələri, əksər ticarət məkanları, məişət xidməti yerləri bağlanıb, toy və şənlik məclisləri, dəfn istisna olmaqla yas mərasimlərinin keçirilməsi yasaqlanıb, ölkə ərazisində gediş-gəlişə, ictimai nəqliyyatın hərəkətinə, insanların evdən çıxmasına məhdudiyyət qoyulub.
