Blokada etirazları
AXCP sədri, Demokratik Qüvvələrin Milli Şurasının Koordinasiya Mərkəzinin üzvü Əli Kərimli müraciət yayıb.
Bakının Süleyman Rəhimov küçəsində yaşayan Əli Kərimlinin evində internet və telefon rabitəsi aprelin 13-dən bəri kəsilib.
Novator.az-ın məlumatına görə, AXCP sədri yazır: “Blokadaya alındığım bu günlərdə mənə dəstək olan hər kəsə təşəkkür edirəm. Hakimiyyətin məni blokadaya almasına etinasız qalmayan, etirazını bildirən hər bir ictimai-siyasi xadimə, jurnalistə, sadə təəssübkeşə, sosial şəbəkə fəalına, eləcə də Milli Şura və AXCP üzvlərinə, bütövlükdə haqqa dayaq olan vətəndaşlarımıza minnətdarlığımı çatdırıram.
Eyni zamanda hamıdan xahiş edirəm ki, mənim blokadaya alınmağım başqa vacib problemlərimizi arxa plana keçirməsin, unutdurmasın. Xüsusilə insanların həyatı üçün narahatlığa ciddi əsas olan indiki məqamda günahsız yerə həbsdə saxlanan siyasi məhbuslarımız, o cümlədən koronavirus pandemiyası ilə mübarizə dövründə müxtəlif uydurmalarla inzibati həbsə məhkum edilən fəallar diqqətdən kənarda qalmamalıdır. Həm onların, həm də başqa, azad edilməsi mümkün olan dustaqların heç olmasa koronavirus təhlükəsinə görə azad edilmələri tələbi ilə israrlı kampaniyalar aparılmalıdır. Hamını belə kampaniyalarda fəal iştiraka səsləyirəm.
Aprelin 20-də Azərbaycanın gerçək qəhrəmanlarından biri, Qarabağ döyüşçüsü, Milli Şuranın Koordinasiya Mərkəzinin və Müsavat Partiyasının üzvü Tofiq Yaqublunun apellyasiya məhkəməsi olmalıdır. Onun müdafiəsi Azərbaycan demokratik ictimaiyyətinin gündəliyindən çıxmamalıdır. Apellyasiya məhkəməsi Tofiq bəyə bir xalq olaraq hamılıqla daha gur səslə azadlıq tələb etməyimiz üçün əlavə fürsətdir”.
Azərbaycan Demokratiya və Rifah (ADR) Hərəkatının sədri Qubad İbadoğlu özünün “Facebook” səhifəsində bəyanat yayaraq hakimiyyəti karantin rejimindən siyasi məqsədlər üçün sui-istifadəyə son qoymağa çağırıb: “Bir həftədir ki, AXCP sədri və onun ailəsinə ətraf mühitlə təmas və rabitə vasitələrindən istifadəyə imkan verilmir. Əli Kərimli və ailəsi məqsədli şəkildə cəmiyyətdən tədric olunub, informasiya blokadasına salınıb. Telefon və internetə çıxış imkanlarının məhdudlaşdırılması onun və ailəsinin ətraf mühitlə əlaqəsində, ərzaq təminatında və dərman təchizatında da problemlər yaradır. Çünki evdən çıxış icazəsinin əldə olunması yalnız telefon vasitəsilə mümkündür.
ADR Hərəkatı hesab edir ki, hakimiyyətin qlobal pandemiya dövründə tətbiq etdiyi karantin rejimindən sui-istifadə edərək siyasi opponentlərini cəmiyyətdən müxtəlif vasitələrlə təcrid etdirməsi heç bir siyasi etika və mədəniyyət normasına sığmır, hazırda cəmiyyət üçün daha çox önəm daşıyan həmrəylik və birliyin yaranmasına mane olur, əhalidə hakimiyyətə etimadsızlığı artırır. ADR Hərəkatı hakimiyyəti AXCP sədrinin informasiyaya və rabitə vasitələrinə çıxış imkanlarını bərpa etməyə, Tofiq Yaqublunu və həbsdə olan bütün siyasi fəalları, jurnalistləri azad etməyə çağırır”.
Özünün “Facebook” səhifəsində açıqlama yayan Azərbaycan Xalq Partiyasının sədri Pənah Hüseyn Əli Kərimlinin və ailə üzvlərinin mobil telefon əlaqələrinin kəsilməsini pisləyib, “bu rüsvayçı halı” aradan qaldırmağa çağırıb.
Müsavat Partiyasının başqanı Arif Hacılı da özünün “Facebook” səhifəsində hakimiyyətə səslənib: “Pandemiya dövründə siyasi müxalifətə qarşı repressiv tədbirləri həm Azərbaycan cəmiyyəti, həm də beynəlxalq birlik böyük narazılıqla qarşılayır. Tofiq Yaqublunun qondarma ittihamlarla həbs edilməsi, bunun ardınca bir çox siyasi fəala, jurnalistə, AXCP üzvlərinə, xüsusilə Əli Kərimliyə yaxın olan partiya üzvlərinə və şəxsən onun özünə qarşı olan təzyiqləri qətiyyətlə pisləyirəm. Azərbaycan hakimiyyətini cəmiyyətdə qarşıdurma yaradan addımlardan çəkinməyə, siyasi təqiblərə son qoymağa çağırıram”.
1965-ci il təvəllüdlü Əli Kərimli milli azadlıq hərəkatının öncül şəxslərindəndir. Əbülfəz Elçibəyin prezidentliyi zamanı (1992-1993) əvvəl Prezident Aparatının şöbə müdiri, sonra dövlət katibi vəzifəsində çalışıb.
1993-cü ildən AXC sədrinin siyasi məsələlər üzrə müavini, daha sonra AXCP sədrinin birinci müavini olub. 1995 və 2000-ci illərdə Milli Məclisin deputatı seçilib. 2000-ci ildən AXCP-yə rəhbərlik edir.
2013-cü ildə yaradılmış Milli Şuraya tarixçi alim Cəmil Həsənli sədrlik edir. Qurumun rəhbərliyində Əli Kərimli ilə yanaşı Müsavat Partiyasından Tofiq Yaqublu, Vətəndaş Həmrəyliyi Partiyasından Rafiq Manaflı, Qarabağ Uğrunda İslami Müqavimət Hərəkatından Rövşən Əhmədli, sabiq deputatlar İbrahim İbrahimli, Gültəkin Hacıbəyli və başqaları təmsil olunur.
Tofiq Yaqublu yenə həbsə gedir
Prezident əfv sərəncamı imzalayıb
Müxalif siyasətçilər əfvi yarımçıq sayır
İlkin Rüstəmzadəni polisə çağırırlar
“Koronavirus demokratiyanı öldürə bilməz”
“Azadlıq”ın əməkdaşına cinayət işi açılıb
AXCP sədri təcridetmə əməliyyatından yazıb
Əli Kərimli yenə internetsiz qalıb
Tofiq Yaqublunun məhkəməsi qapalı keçiriləcək
