Azərbaycan vətəndaşlığı qanununun 10-cu maddəsi yenilənir. Novator.az bildirir ki, parlamentin 17 aprel iclasında edilən dəyişikliyə görə, 10-cu maddənin mətni belə rəsmiləşir: “Azərbaycan Respublikasının vətəndaşı olan şəxsin ikili vətəndaşlığı olduqda (Azərbaycan Respublikası vətəndaşlığı ilə yanaşı digər dövlətin (dövlətlərin) vətəndaşı olduqda) həmin şəxsin xarici dövlətin vətəndaşlığına mənsubiyyəti Azərbaycan Respublikasının beynəlxalq müqavilələrində nəzərdə tutulmuş və ya Azərbaycan Respublikası Konstitusiyasının 109-cu maddəsinin 32-ci bəndinə müvafiq surətdə həll edilmiş hallar istisna olmaqla tanınmır.

Xarici dövlətin vətəndaşlığını qəbul etmiş Azərbaycan Respublikasının vətəndaşı bir ay müddətində bu barədə müvafiq icra hakimiyyəti orqanına yazılı məlumat verməlidir”.

Yenilik 2020-ci il mayın 1-dən qüvvəyə minir.

Əvvəlki varianta əsasən, xarici dövlətin vətəndaşlığını qəbul etmiş Azərbaycan vətəndaşı bir ay müddətində bu barədə müvafiq icra hakimiyyəti orqanına yazılı məlumat verməyəndə cinayət məsuliyyəti daşıyırdı.

Konstitusiyanın 109-cu maddəsinin 32-ci bəndi prezidentin Milli Məclisin və məhkəmə orqanlarının səlahiyyətlərinə aid edilməyən məsələləri icra qaydasında həll etmək səlahiyyətini nəzərdə tutur.