Abşeron Rayon Məhkəməsinin aprelin 17-də çıxardığı qərarla AXCP üzvü Vüqar Əbilova 20 sutka inzibati həbs cəzası verilib. O, polisin qanuni tələbinə qəsdən tabe olmamaqda təqsirli bilinib.

Novator.az bildirir ki, son vaxtlar daha bir necə AXCP fəalı tutulub və ya cinayət məsuliyyətinə cəlb olunub.

Martın 22-si Cəlilabadda tutulan AXCP üzvü Anar Məlikova karantin rejimini pozmaq ittihamı ilə 10 sutka inzibati həbs cəzası verilib.

Martın 24-ü AXCP üzvü Zamin Salayevə Salyanda qəsdən sağlamlığa yüngül zərər vurma ittihamı ilə cinayət işi açılıb.

Aprelin 8-i AXCP sədrinin köməkçisi, “Azadlıq” qəzetinin əməkdaşı Faiq Əmirli Bakıda tutularaq karantin rejimi qaydalarını pozmaq ittihamı ilə 30 sutka inzibati həbsə məhkum edilib.

Aprelin 9-u AXCP fəalı, partiya sədrinin mühafizəçisi Ruslan Əmirov Bakıda tutularaq karantin rejimi qaydalarını pozmaq ittihamı ilə 30 sutka inzibati həbs cəzası alıb.

Aprelin 10-u AXCP üzvü Nicat Abdullayev Bakıda tutularaq polisin qanuni tələbinə qəsdən tabe olmamaq ittihamı ilə 30 sutka inzibati həbsə məhkum edilib.

Aprelin 13-ü Bakıda “Azadlıq” qəzetinin əməkdaşı, AXCP üzvü Təzəxan Mirələmliyə xuliqanlıq ittihamı ilə cinayət işi qaldırılıb.

Həmin gün AXCP üzvü Baba Süleyman Bakıda tutularaq karantin rejimini pozmaq ittihamı ilə 30 sutka inzibati həbs cəzası alıb.

Aprelin 16-sı AXCP fəalı, partiya sədri Əli Kərimlinin mühafizəçisi Niyaməddin Əhmədov Bakıda tutularaq polis işçisinin qanuni tələbinə qəsdən tabe olmamaq və karantin rejiminin tələbini pozmaq ittihamı ilə 30 sutka inzibati həbsə məhkum edilib.